يابنت الفرنجه ومتأصله
وطبعهم البارد غالب عليكي
إعملي حساب لعيشنا وملحنا
ولا مطمر فيكي
يوم م حفيدك لقي ربنا
حزنا وجينا نعزيكي
ليه تستحلي دمنا إنت وأهاليكي
كان لك في يوم محبه في قلبنا
كلمة كره ما تكفيكي
إبعدى كلابك عننا طفح الكيل
منك وحالفين نوريكي
قولي لجيمي ولولوكفايه كده
مهم طالعين ليكي
رضعو منك الطمع والخيانه
يسود أيامهم ولياليكي
وقولي للنسر الهمام سيب ذكرى حلوه
ما هو بيسمع كلام معاليكي
مكفكوش سرقة فلوسنا ودم
خيرة جيشنا وهدر دم زهورنا
اللي كانو بما ما سوزان بينادوكي
يا مجربه حرقة الضني يا هايدى يا حنينه
قولو لحماك ولحماتك وسلفك وجوزك يمكن يسمعوكي
كفايه بحر الدما وكفايه خراب كفايه والله حرام
بنا ديكي بنادى قلب الأم فيكي
================
بيصرخ في ودني صوت
بيقول رايح ماتش ليه أموت
ده انا يدوب في إيدى علم
وبشجع فريقي جوه وبره الحدود
ليه بقي أموت وأتحرم من
طلة أمي وصاحبي الودود
ليه بتقتلني دمي عندك يسوا كام
مين هدر دمي مين دفعلك وقولت له تمام
ليه ياجاهل ليه تبقي للشر عميل
رد عليه ياعويل ولا بلاش مستحيل
راح تفهم مستحيل
============
انا في حالة صمت قول
خوف قلق خنقه زهق كبت
جوايه حاجات ملغبطه
الصوره لسه مشخبطه
شايفه الدنيا بعيني بس
ومع إني شفت القالب
لما إنحني للنص وسكت
لما طال ناب الغيلان
وهي للملاين بترص
ملو كروشهم من دمي
وشبعوا فيه مص
علي لقمة عيشي بدور
والغلا بينهشني نهش
وانا في طاحونه داير سمعت
صوت بيقول سمع هس
في ثوره في الميدان قلت
ده كله هتش في هتش
لغاية ملقيت الطاغيه لراسه نكس
قلت ده بقي صحيح مكنش فش
وللنهارده في الميدان صرخات بتنادى
أصوات دخلت في بعضها والكل بيهاتي
أما أنا صوتي إدهس و ماتت كلماتي
دم وضحايا وحرق والميدان بقي فيه
الثورى والبلطجي والفلاتي
قلبي عليها إرتعش خايف من الآتي
الثوره مش بهدله وحرق للدوله
ولا خرابها خدتوه من الباطن مقاوله
الثوره تغير لنظام فاسد بالعقل والحكمه
إجرى وسابق الزمن ياللي بتحبها
وإصنع لها هودج وزفها لبكرة
اللي جاى والآمل شاهد اولاني
والتحدى شاهد تاني
واتني ياحبيبتي فخرى وعنواني
يامصر إتزيني بتوب الفرح
مصنوع بعرق عمالك
وامشي علي البساط الأخضر
مزروع بيد ولادك
وانتي ياحبيبتي فخرى وعنواني
ليست هناك تعليقات:
إرسال تعليق