حيوانات إحنا ولا بنى آدمين
سمعت همس الصراخ جوه الصدور
سمعت صمت الكلام طنين دبور
دموع عنيه خلت جلد خدودي يدوب
حيطان دارى ضاقت عليه جريت
على الشوارع والدروب
لقيت اشباح لابسة وشاح وأقنعة
وأصوات لاهيه نباح ولانواح
بس بتقبض القلب وتشيب
حاولت افكر لقيت العقل متغيب
الناس بقوا أشباح بضميرأجوف
وقلب من عدم الرضا أخوف
وإيدين محطوطة فى جيب غيرها
والسنة بتزور وبتسوف
وقطيعة رحم بين الأقارب و الشقايق
تجرح القلوب وتوجع الشقايق
والثعابين لقيتها فرصة خرجت من بين الشقايق
صرخت بقوة شيلوا الآقنعة الزائفة
صحوا الضمائر النايمة الى ورا الشيطان عايمة
بلاش الضرب فى الظهر والحرب بين الآرحام
على الدنيا الفانية
انا وأنتم متأكدين ان القيامة قايمة قايمة
طب ليه نضايق بعض .ليه نقسى على بعض
ليه بنأكل بعضنا .جبنا الغل ده كله منين؟
حيونات احنا ولا بنى أدمين ؟
بصوا فى وش بعض وجابوا طبعا مش عارفين
صعب تحددوا لما كل الشر ده على الجبين
لما عينكوا تبقى صاحية وانتم نايمين
عيون خايفة لأنكم مع نفسكم مش صادقين
والدم نازل من بأكم ماهى أسنانكم بقت سكاكين
أما مخالبكم تحتها جلودكم زى الديابة غدارين
أوعوا تقولوا انكم أحياء دانتوا ميتين
حاولت ألملم خطاويه مشلتنيش رجليه وضعفت حيلتي وزادت حيرتى
سمعت صوت الآذان ملا وجدانى
الله أكبر هزتنى وبعد التشهد لقتتى كلى أمل
حى على الصلاة مسحت همومى وأحزانى
حى على الفلاح قوتنى ووقفت على رجلى من ثانى
أتوضيت والفرض ر بنا وفيت ومن كل قلبى دعيت
يثبت امة محمد وينور بصيرتها كفاكم الشر وكفانى
