الأحد، 6 مارس، 2011

يالا بينا نحلم

مفيش زيارات من الأصحاب يمكن يكونو زعلانين من اللي كتبته ولا يمكن مش بيجو من أصله



ربنا م يجيب زعل انا عارفه أنهم أكبر من الحجر علي رأى بس يهمني لو بيدخلوا المدونة وفيه حاجة



مش عجباهم يوضحوا لي وجهة نظرهم وده حقي عليهم....



المهم أني إصبت بتخمة من البرامج وحاسة ان دماغي بقت عاملة زى البطيخه النمس وعنيه إتحوليت



وتشويش في قناة إستاكيوس أنا بقه عمالة أسمع حاجات مش عارفه أيه هيه مثل ............



الليبراليه وديمونقراط وعلشان معملش زى القذافي وألف قلت أسألكم يمكن حد منكم ينسي ويزور المدونة



ويشرح لي الكلام ده ....



كان البوست اللي فات كتبت شروط الدستور في شخص الرئيس القادم من وجهة نظرى المتواضعة



فوجئت بالمستشار طارق البشرى طالع علينا بمثل ماطلبت وزاد كمان جنسية الزوجة يجب أن تكون مصرية



طبعا أنا معرفش سيادة المسشار يمكن يكون زار المدونة وعجبة رأى يادى الهنا



بصراحة هو ليس برأى لي ولكن في المدرسة ايام م كنا بندرس في كتاب التربيه الوطنيه وكتاب التاريخ



كان مكتوب يجب ان يكون رئيس الجمهورية مصرى من أبوين وجدين مصرييين ... وكنا نسأل فيجاب علينا بالأتي



انه في حال وجود والديين أو جديين بحكم صلة القرابه تكون أسرار الدولة ليست في مأمن لأن ولاء الفرد لوطنه


فكيف لو أن هناك بعض المشاكل بين مصر ودولة يحمل الأباء والجدود جنسيتها هناك إحتمال ولو واحد بالمائه لتسريب


معلومات تخص الأمن المصرى ॥ ولو الشخص نفسه يحمل جنسية أخرى فهذا معناه أنه إبتعد عن الوطن لم يندرج في



مشاكله يمكن يكون سمع عنها ولكنه لم يعيش هذه المشاكل ممكن للرجل أن يتزوج إثنين يعيش معهما وكل منهم



تذكره دائما بأنها ملاذه وصاحية فضل عليه وأكيد انه سيميل لإحدهن , هكذا درسنا وهذا مفهومنا ,انا ياأحبابي



بتكلم بفكرى انا دون فرضه علي أحد لو به خطأ فهموني لو هناك إختلاف في وجهة نظر وضحوا لي وجهة نظركم



انا واحدة بأستقي معلوماتي عن طريق الصحف والقنوات الفضائيه وأحيانا من الإنترنيت لاأقرأ كتب ولا أحضر ندوات


لأن هذا غير متاح في الأقاليم وحتي في القاءات العائلية يعتبر الحديث في شئون البلاد نوع من الروقان وياعم فوضك



بلا وجع دماغ...

======================================================


شوفوا بقه بجد انا مصابه بصدمه صادمة صدمتني


فإصتدمت بحائط صادم فإرتطمت فصد عني فستند ت



حتي لاأقع ولإفكارى لملمت بمن أثق والكل يشير لبعضه بالخيانة



ويشكك في انتماء غير فكره بإهانه



ليس بعد صدمتي في من علا بفضل دفاعه عن أرض الكنانه



ثم علا علي كرسيه فثقل عليه فأرداه أرضا



وسقط من عنانه



ضحي من أجلي يوما فكان هذا دينا في رقبتي الي يوم القيامه



فعجل بقيامته فإستحق



أن يقلع من جدور الأرض هو وغلانه



انا سأنتظر حتي الحساب العسر وبعدها سأعتذر



وحتي هذا اليوم وإلي ان تفني الأرض لمصر وأهلها السلامة

====================================================


عرفت انهم بيدرسوا كتاب الدكتور فاروق إلباز خريطة التنمية ياترى أسمه كده ولا انا بقول وخلاص



وياريت كمان ياريت يطبقوه هو وكتاب الدكتور زويل عصر العلم وكمان كتاب دكتور محمد البرادعي



مع اني مش نازل لي من زور بس كل مافيه صالح مصر يهون علشانه كل شئ ..........


بس يارب الحال يهدأ


=======================================================



في حاجه نفسي تحصل شهداء الثورة الشباب اللي زى الفل دول ربنا يصبر أهلهم لو حد يعرف



كل واحد فيهن كان نفسه في أيه حلم يعني وكان نفسه يتحقق غير التغيير حاجه لنفسه ويحققها لحد من قرايبه



متهيئ لي إن بكده نكون حققنا حلمه لحد قريب له أو تجمع تبرعات لعمل رحلات حج أو عمرة لأبائهم وزوجاتهم



بالنسبه للمسلمين اما المسيحيين تصرف لهم نفس قيمة العمرة أو الحج نقدي


دى فكرة...........

=================================================


شفتم الفضيحة إللي بجلاجل شفتم مباحث هم الدولة


لاتعليق ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟




==================================================



يجماعةعاوزين نفضي لمصر شويه المكان محاصر



صحيح إن قاسم والأربعين حرامي ويمكن يزيدو عن الأربعين


في زلازل مرميين لكن ده مش معناه إننا نننام مطمنين
لحظو إن فيه بلطجيه وحارميه متشردين
في إيدهم سلاح آلي وسنج وسكاكين
وأعداءمن ال صهاينه علي الحدود متربصين
وصوص نخرفي جنوب حدودنا بقم متفرقين
وغربنا حاكم خلل في عقله بيضرب أهله
ده في أى مله وأى دين
وهناك أسطول في المتوسط بيتلكك عايز
قال آيه يحمي حرية لبييه من زعيمها وولاده المجانيين
من امتي الثعلب بيحمي عشة الفراخ يانصحيين
كنت حميتو العراق من الفتنة يا أمريكيين
عايزيين مصر مفتحة مشغله دماغها
علشان أى مؤامرة نجيب داغها
ونشوف اللي سرق وحرق وضلل كان لصالح مين
وده وإحنا بنبي ونعمر ونصنع ونزرع فدادين
واحفضل أحبك يامصر ياغاليه ليوم الدين
بحبك يا مصر

هناك 10 تعليقات:

norahaty يقول...

السلام عليكم ورحمة
الله تعـالى وبركاته
ولا عمرنا نزعل منك
ابداً يااستاذة وفاء
ياام القلب الطيب
ولكنها مشاغل الحياة
واحداث بلادنا المتلاحقة
ربنا يطمنا على بلدنا
وينصرها يارب ويكون اللى
حصل دا بداية إصلاح لأحوال
ناس بلدنا أصلاح أنفسهم
قبل ما يكون إصلاح سياسة

وفاء بركات يقول...

أهلا بالحبيبه الغالية
والعزيزه القريبة من قلبي

دكتورة نور هاتي

خايفة علي مصر قوى ربنا يكتب لها السلامة

ويكون الجي أحسن ويولي عليها من يصلح

دمت لي

فشكووول يقول...

السلام عليكم وفاء هانم
تحياتى
ما علهش والله عشان انا بقيت كسول واهم من انى بقيت كسول بقيت عاشق للكسل والنوم على السرير والبطاطين وقدامى الجزيره والعربيه والحره واون تى فى وما تيسر من القنوات الاخباريه .. ومنى الشاذلى العسل والبنت السكره دينا بتاعة صباح دريم والشوية المذيعات الحلوين بتوع التوك شو وانا متغطى بالبطاطين ومدفى نفسى ويا دوب عينى بره البطاطين اشوف واسمع.
اليومين دول بقى طقت فى نفوخى انى اعمل صفحه على الفيس بوك .. طبعا استلفت محمود ابنى عشان يعملها وهو ضارب بوز كأنه جايب لى العزبه بتاعة اللى خلفوه .. لكن انا طبعا بما انى دكتاتور ومستبد صممت والواد امره لله وعمل لى الفيس بوك بتاعى ويا ستى هانم انا كما ابتديت على التدوين حمار برضه انا على الفيسبوك حمار وعمال اهبل وازبد وارغى ولا عارف الكلام بيروح فين ولا مين اللى حيقراه وكله هبل فى هبل وخلاص.. واطبل واهبل والله زى ما يكون العيال بيضحكوا على الراجل الغبى اللى مش عارف يكتب فين ولا يقول ايه.. المهم

فشكووول يقول...

خلينا بقى فى الموضوع
انا شايف ان حضرتك قلقانه ... طبعا القلق واجب بل ان القلق له ما يبرره وخصوصا ان ( ثورة الشعب المصرى ) وليس ثورة الشباب كما يقولوان .. هذه التسميه الغلط ممكن تبوظ كل حاجه عشان الشباب دول ممكن نضحك عليهم ببمبونايه على رأى احمد شفيق .. لكن الصح انها ثورى الشعب المصرى بكل اعماره وطوائفه من الطبيعى ان الشباب فى اى دوله يشكلون اغلبيه فكان ظهورهم واضحا (بارك الله فى الجميع)
يتبع

فشكووول يقول...

شوفى يا هانم
مش ح اتكلم عن الثوره ولا عن اللى حصل ولو ان اللى حصل ملحمه بكل المقاييس سوف اتناولها بعد جمع وثائقها عشان ما اقولش كلام هبل
كمان مش حـ اتكلم على اللى ما يتسماش اللى كان وارثنا ضمن عزبة ابوه ونهبنا هوا والتمليه اللى عنده واكلنا البالوظا طول 30 سنه
انا حـ اتكلم على اللى حصل بعد الثوره
اللى حصل بعد الثوره لا يتقال ولا يتحكى
اولا نجحت الثوره باكبر تحد واكبر قوه بوليسيه تواجه شعبا كاملا

كان من المفروض ان يتشكل مجلسا رئاسيا مؤقتا يحكم مصر .. ولكن حكمها المجلس العسكرى .. ما علينا
كان مفروض يعملوا دستور من اول وجديد ولكن عملوا تعديلات .. ما علينا
كان مفروض كل الرموز تروح فى نصيبه تاخدهم وتاخد ابوهم ولكن ما زال الصف الاول والثانى اللى خربوها وقعدوا على تلها موجودين وهؤلاء سرقوا ونهبوا فتات اللى ما يتسمى .. وبالنسبه لنا الفتات دا يحل مشكلة اكتر من 10000 اسره .. مش عشرة الاف فرد
كان مفروض المحليات تروح فى سكة اللى يروح ما يرجعش
ومع ذلك .. انا من رأيى ان ما حدث يمكن ان يبنى عليه فى المستقبل وهو اقل ما نصبوا اليه ويعتبر حلما لم نكن ننتظر ان يتحقق ابدا
كمان خدى بالك يا هانم ان الثوره نجحت بتوفيق من الله سبحانه وتعالى وكل الدلائل والمعطيات لم تكن تؤتى اى نجاح ولكن الله يمهل ولا يهمل
يتبع

فشكووول يقول...

المشكله الكبيره اللى ما حدش واخد باله منها الا الصفوه او النخبه
انا خايف من اللى حصل من انقلاب 52 وانا اصر على انه انقلاب وليس ثوره وهو ان العسكر يسطون على الثوره ويستحلون السلطه .. وعشان كدا انا مش مع اللى بيقولوا نؤجل الانتخابات احنا مستعجلين على ايه .. وادى انت شايفه العسكر فى ليبيا من سنة 69 ماسكين فيها ومتبتين واللى حصل فى 52 واللى بيحصل فى اليمن وحافظ الاسد عمل فى سوريا ايه وبعدين ادى العزبه ميراث لابنه بشار واللى كان بيعمله زين العابدين ومجهز جوز بنته عشان يمسك البلد بعده وبوتفليقه اللى عامل حسابه ان يسيب البلد لاخوه وكأنها يغمه ويخنى يفرقوه على اللى مخلفينهم جاتهم البلاوى هما واللى جابوهم .. انا عايز الاول نعرف ازاى ننتخب رئيس جمهوريه بصندوق انتخابات حر ونزيه وله مده دستوريه باقصى حد 8 سنين ويارب يكون مجرم وابن كلب وحرامى بس انا وهو عارف انه بالكتير 8 سنين ويغور يروح فى داهيه .. كمان عايز مجلس شعب انا اللى اختاره مش يختاروه لى ... صدقينى سيحدث الفارق بالشرطين دول .. ونظفر ببلدنا بعيدا عن حكم العسكر.. والناس مش واخده بالها

فشكووول يقول...

وبعدين يا ستى
المظاهرات الطائفيه اللى عايزين يعملوا الصح والغلط كمان ويقولوا ثوره
ومظاهرات الفلاحين ضد الاصلاح الزراعى وضد الاوقاف بالرغم من ان طلباتهم غير موضوعيه وتتسم بالضلال والغى
ومظاهرات ضد الحكومه فى كل مكان
واللى بيحصل فى امن الدوله ربنا ياخدهم
واللى بيحصل من الشرطه .. واللى حصل يوم 28 يناير ... الخيانه العظمى اللى حصلت من العادلى وبطانته وطبعا حسنى هو ابو الكرامات اللهم لا شماته
واللى بيحصل من يومين من المظاهرات الطائفيه امام الازاعه والتليفزيون من الاقباط عشان اللى حصل للكنيسه بتاعتهم فى قرية مش عارف اسمها ايه فى حلوان
والنهارده بقى المظاهرات بتاعة السيدات فى ميدان التحرير بيطالبوا بـ 50 % من الوظائف للنساء واحقيتهم فى الترشح لرياسة الجمهوريه مع ان الشروط واضحه وصريحه ويستطيع النساء ان يتقدموا طبقا للشروط .. ولكنها بقت هوجه وصاحبها غايب

فشكووول يقول...

المشكله الكبيره يا ست هانم ان الدوله المصريه بهذه الطريقه ستنهار .. ويا ويلنا اذا انهارت الدوله وطبعا انتى عارفه الفرق بين الدوله والحكومه والفرق بينها وبين النظام .. الدوله تظل قائمه اذا سقطا الحكومه .. وايضا تظل قائمه اذا سقط النظام
اكبر كارثه حدثت فى التاريخ اذا انهارت الدوله المصريه .. كما فى الصومال .. كما فى افغانستان .. كما فى العراق الى حد صغير .. غابه يا هانم .. غابه .. والجدع اللى ياخد خقه بايده وكلنا وقتها مقتولين قتلا جسديا وليس معنويا .. وانا شايف ان مقومات سقوط الدوله المصريه قائمه هذه الايام
عارفه يا هانم الموظفين بياخدوا مرتباتهم من الايراد الجارى للدوله .. من الفلوس اللى بتدفع للدوله يوميا وتورد الى خزينة وزارة الماليه وآخر الشهر الماليه تطلع مرتبات الموظفين وبعدين العمليه تفضل ماشيه لحد نهاية السنه الماليه ويعملوا بقى الحسابات ويظبطوا كل حاجه
ايراد الدوله اليومى والجارى انخفض الى تقريبا لا يزيد عن 5 % وما حدش واخد باله.
يمكن الناس تقبض مرتبات شهر مارس لكن اذا استمر الموضوع بهذه الطريقه .. يمكن الناس ما تلاقيش مرتبات شهر ابريل ولا نلاقى ناكل ولا نلاقى سوق ولا طماطم ولا خضار ولا رز ولا سكر ولا ولا ولا وندير على بعض ناكل فى بعض .
الموضوع فى منتهى الخطوره وللاسف احنا شعب معظمنا جاهل واللى بيقدر يخطف حاجه بيخطفها ولا بيفكر فى غيره وقد اصبحنا من الخطافين والانانيين ..
انا بقى من وجهة نظرى اطالب القوات المسلحه بفرض الاحكام العرفيه والضرب بيد من حديد حتى ترجع قوة الدوله ووبعدها نشوف ح نعمل ايه
يا هانم الموضوع طويل ومعقد وربنا يسترها معانا
قولى آمين
تحياتى

همس الحنين يقول...

صباحك سكر وفاء

اممم هو مين الي مزعلك بس

انتي قوليلي وانا اقطم لك رقبته

<<< عامله بلطجيه

اصلي دخلت مدونتك وانا متعصبه شويا

وكمان العقرب بتاع الماوس خوفني

هههه

ماتشغليش بالك

بجد مدونة جميلة واسلوبك حلو وصريح

ويارب تبقى مصر بخير وبأمان

بالناس الي بتحبها

صباحك ورد

تحياتي

د.ريان يقول...

مساء العطر ياوفاء

ويارب يطمنكم ويطمنا على الحال

بمصر الحبيبة بوست رائع من قلمكم

وكم تشرفت بتواجدي هنا

دمتم بكل جمال