الاثنين، 2 فبراير 2009

من أرشيف حياتي(أطعم وألذ طبق لحمه كلته في حياتي)

أطعم وألذ طبق لحمه أكلته في حياتي كان تقريبا في65يعني كان عمرىحوالي11سنه


كان ابي وأمي رحمة الله عليهما وأخي الأصغر أطال الله بقائه في سفر للقاهره وتركاني


وأختي الكبرى ربنا يعطيها الصحه لوحدنا بالمنزل وكان أحد العمال لدى والدى يأتي في


المساء نكتب له مانحتاجه بورقه وننزلهامن البلكونه بواسطة السبت وفي يوم أخر العامل علينا


وللصدفه لم يكن هناك خبز بالمنزل وايضا لاجبن ولابسطرمه ولعدم وجود ثلاجه كنا بنجيب الأكل يوم بيوم


الظروف حكمت علينا بإن لايوجد طعام بالمنزل بدأنا نشعر بالجوع فكرت وأختي


بالوقوف بالبكونه ونتفرج علي حلقة ذكر لأحد الجيران وكان هناك مشاهد غريبه علينا ناس تدوخ وتقع


وناس عماله تصقف وأناشيد دينيه وناس بتقدم نقوط والمنشد يقول ياربنا أحفظ لصاحب النقوط المهم الجو


ده أخدنا من الجوع لحظات ليست بالقليله ولكنه عاد من جديد ليمارس سخفاته معنا ووقف تفكيرنا عن عمل


حتي أرز أو مكرونه الجوع مسح تفكيرنا॥


بينما نحن في هذه الحاله وإذا بالباب يدق سألنا عن الطارق سمعنا صوت أنسه بتقول انا أفتحي جايبه الفته


فتحنا بسرعه دون النظر للقادمه وكل إهتمامنا منصب في البخار المتصاعد من سلطانيه اللحمه والرائحه


الفواحه وأرغفة العيش المملوءة بالأرز وشكرنا القادمه وقفلنا الباب ووضعنا صنية الطعام العامره بالهبر


علي الأرض ونحن نلف حولها علي شاكلة فرقة ساعه لقلبك في فيلم حماتي ملاك ... وجلسنا أمام العزيزه


الغاليه سلطانيه اللحم وأفرغنا الأرز في طبق وأفرغنا كل المحتويات في جوفنا وإمتلأنا لحد أننا لم نستطع


القيام من مكاننا ونحن نتغزل في طعم اللحمه والأرز المفلفل ورائحة الطعام اللي تجنن ....


لحظات


وأطلقت أختي صرخه


أرعبتني ।لازم ننرجع الأكل ده


إزاى ده جوه ده انا اللي بقول


ولو يرجع يعني يرجع


دى أختي


قالت لي مين اللي جاب الأكل قلت معرفش انا كل همي كان في سلطانيه


اللحمه وريحتها وبطني اللي بتتقطع من الجوع


دى ؟؟؟؟اللي جبتها


والليله اللي تحت بتاعتهم



وحترك الموقف ده للحظات لأوضح لحضراتكم سبب المشكله


الناس دى كانت لاتملك غير حله واحده تستخدم في مسح البيت وغلي الغسيل وطبخ الطعام


وكانت تملأ بالماء وبجوارها طشت غسيل تضع اولادها بالطشت وبالكوز تسكب كوب واحد للتليف وأخر للشطف


وكنا نقف بالبلكون نشاهد هذا المنظر الغريب وحاول الجيران ان يمنعوها من هذه الفعله ولكن لافائده وخصوصا


ان الشارع كان به ماره كثير وهي كانت تسكن في حاره متفرعه من هذا الشارع ... وبما إن الجوع كافر فقد


نسينا تماما الحله وصحبتها وأكلنا بالهنا والشفا .... كانت الساعه الحاديه عشر مساء فإذا بصوت العامل ينادى


مقدما أسفه علي التأخير ويسألنا عن إحتياجتنا فنظرنا انا وأختي لبعض وإنطلقنا في الضحك ...


إفتكرت انا وأختي هذه الحادثه ورويناها لأحفادها لكثرة رفضهم لأنواع كثيره من الطعام ليحمدو ربنا علي نعمه


لإن فيه ناس كتير لاتجد ماتأكله وأحيانا بتموت من الجوع أو الجوع يخليهم يكلوا من غير ما يفكروا زى


حلاتنا ....


بس والله كان أطعم طبق لحمه أكلته في حياتي بصرف النظر عن الحله إنسوا مش مهم الحله المهم الهبر

اللي جوه الحله حتي أسألو الأستاذ فشكوووووووول هو اللي حيقدر الموقف ده

الي لقاء آخر في أرشيف حياتي

هناك 17 تعليقًا:

Asmaa Fathi يقول...

ههههههههههههههههه

مش مهم الحله المهم الهبر

حكايه دمها خفيف
بصراحه انا من الناس اللى معظم الاكل مبيعجبهوش
بس بعد كده هاكل وخلاص مهما كان الاكل مش هيتعمل في نفس الحله

تحياتى

وفاء بركات يقول...

إزيك ياجنه
اللي ياكل علي درسه ينفع نفسه
بدل متكلي مقلب سخن مفحفح..
كل نعم ربنا حلوه يارب أحفظها من الزوال..
تقبلي تحياتي...

فشكووول يقول...

وفاء هانم .. تحياتى
اكيد انت قريتى اللوحه عندى وانا كاتب بحب اولادى وبحب اللحمه
اصل يا استاذه والله الواحد لما بياكل لحمه بيقعد كدا منبعج من الانبساط وكتير انا والحاجه بنتخانق واقول لها هاتى كمان حتة لحمه وهى تقول لأ .. انت فاكره البوست بتاع العيد الكبير لما امى كانت بتعمل اللحمه على الكانون اللى بره الدار وانا اولع الكانون واسرق شوية لحمه من الحله الانجر واروح ادخل بالطبق الغيط واقعد اكل فى اللحمه اللى اناسارقها .. لحد الوقت برضه باسرق من مراتى اللحمه واكلها من غير ما تحس .. بس فيه فرق بين زمان والوقت .. اصل اللحمه بتاعة امى كانت كتير .. كلام فى سرك ابويا الله يرحمه ويرحم امى كمان كان جزار وكانت اللحمه البايره فى بيت ابوها وانا بقى كنت ابوها واسرقها من امى وما كانتش تبان .. لكن لحمة مراتى يا دوب ربع كيلو لحمه واى تنتوفه تتسرق تبان ونعمل بقى فضيايح .. كمان اصل الحاجه عندى ما بتعملش لحمه خالص الا اما اسامه والهام ييجوا عندنا يقوم المطبخ طول يوم الخميس شغال ومش عارف بتعمل ادرك ايه ومااصبر ايه عشان ولادها وحرمانى انا والواد محمود ابن الكلب الصغير طول الاسبوع وما يهونش عليها تاكل ولا تعمل حاجه الا اما ولادها ييجوا وياكلوا معاها .. طب الهام سافرت امبارح الاثنين السعوديه مع جوزها .. خدى عندك بقى حرمان ييجى شهرين او تلاته من الاكل الحلو واتظلم انا والواد محمود حتى اسامه ومراته والواد احمد ابن الفرطئوسى من الاكل حتى تتوازن الحاجه مع نفسها وتنسى الهام شويه تقوم بقى تعمل لحمه وهبر وحاجات حلوه وزى بعضه يوم الجمعه بس اللى اسامه بييجى فيه .. طب وانا اجيب امى منين الوقت .. المشكله انى مش بعرف اكل اى حاجه من غير ولادى .. ساعات اكون معدى على مطعم وتبقى ريحة اللحمه حلوه والكباب كدا ريحته ماليه الشارع .. والحمد لله معايا الفلوس .. بس مش اقدر اكل ولو حتى سندوتش من غير ولادى
يا نهار ابيض انا كتبت ييجى صفحه ونص .. ما علهش يا وفاء هانم اصل انا بعز اللحمه قوى
حااحط صورة اسامه بس اما الواد محمود يحطها لى على الكمبيوتر
تحياتى

فشكووول يقول...

على العموم بالف هنا وشفاء فيه حد يشوف لحمه وما يقدرش ياكل .. ومش مهم الحله .. اصل اللحمه بتنسى الواحد نفسه يبقى مش حينسى ان الحله مش نضيفه ..
الاستاذ محمد الجرايحى كتب لى وقال ان الصوره مش تناسب حضرتك .. وبالرغم من ان الصوره كانت عجبانى .. قمت امرى لله غيرتها ودست على قلبى ورزقى على الله
تحياتى وفاء هانم

وفاء بركات يقول...

أهلا أ..فشكول
طبعا قرأتهاوعرفت حب حضرتك الشديد للأولاد حفظهم الله من كل سوء وحب اللحمه
حفظها الله من الجنون البقر وجنون الأسعار.
انا قلت محدش حيقدر الموقف غيرحضرتك
المهم جت سليمه ...
وربنا يكتب سلامة الأبنه الغاليه الهام
وتيجي بالسلامه لتزيد حصتك من اللحمه
وتقدر تقلب الحاجه في حتتين تلاته.
أو إتفق مع الأحفاد علي حاجه كده من تحت التربيزه.. إتصرف يعني كل في حب اللحمه يهون..
بالنسبه للصوره دى وجهات نظر ورأى الأستاذ محمد الجارحي يحترم غير يا أ.فشكول
الصوره المهم متبقاش كئيبه بصراحه بتفكرني بصاحبة الحله والله بجد..
وبعدين حضرتك تعلق في كتاب ولا يهمك آيه يعني صفحه ونصف هو إحنا نطول
ده شرف لينا يافندم
تقبل تحياتي وسلامي للعائله الكريمه

hasona يقول...

kisg

خالد احمد محمود يقول...

أحترامى وتقديرى

أكيد كل عام من أعوام عمر حضرتك مده الله وجعله عامر بالصحة والعافيه... يحمل فى طياته...
زكريات فرحه ومرحه ومعبره عن تجربة حياه ....
القصه بها معنى اكبر من طعم اللحمه ..

كما أننى عجبت من هذا التصريح بالعمر

أحترامى وتقديرى

وفاء بركات يقول...

أهلاأستاذ حسونه الشهير بمحمد
هو انا مش عارفه ترجمة الكلمه عم جوجل مرضيش بعبرني ولا حتي قاموس
إلياس لكن انا حرد
وقول أشكرك إن لم يكن للتعليق
فلمرور
تحياتي

وفاء بركات يقول...

أهلا بك أستاذ خالد خالد
وبأشقاء وادى النيل شكرا لهذا المرور
الغالي العزيز...
سعيده لأن الموضوع أعجبكم ...بالنسبه
لموضوع السن انا عمرى مخفيت سني لإني
مؤمنه بإن كل مرحله سنيه ليها بهجتها
فأنا سعيده بتجاربي في الحياه سواء كنت مررت بها أوعشتها مع من حولي
وأعجب لمن ينكرون سنهم أو يغضبو عند ما يسألهم احد عن سنهم
ولكنها وجهات نظر ...
انا ممتنه لهذه الزياره وأرجو أن
تتكرر..
تقبل تحياتي

hasona يقول...

السلام عليكم

أسف علي التعليق السابق
اعتبريه ضحكة بأي لغة
قعدت أضحك ومش قدرت أعلق
فخرج الحرفين دول بدون قصد
،،،
ما علينا
محمد الشهير بحسونة
مقبولة برضه
،،،
أصل فيه مواقف كده تخلي الانسان يتذكر مواقف مشابهة أو خياله ياخده لبعيد قوي

وتذكرت كلمات للشيخ الشعراوي ( رحمة الله عليه ) لما كان بيفسر النعمة
وبيقول لو انسان شبعان وعنده اكل كتير
تلاقيه كل حاجة يطلع فيها عيب ويقول ده ملحه كتير ده ناقص سكر - وهكذا
لكن لو جعان - لو لقي لقمة عيش علي الارض هيلتقطها ويسمحها ويأكلها من غير تفكير - حتي لو جاله التفكير بعد كده - خلاص أكل بالهنا والشفا
حتي انه يفكر انه يرجع اللي أكله- يمكن مش يلاقي غيره

فما تشغليش بالك بالحلة وما كان يفعل فيها وبها- وساعة البطون تتوه العقول


الحمد لله علي أنكن لازلتم عايشين
ويجعله عامر
،،،
فعلا فيه ناس كده
ومش لاقية أي شئ تاكله
وممكن كل يومين أو ثلاثة لما تجد ما تأكله
وممكن تموت من الجوع

احنا في نعمة كبيرة
الحمد لله عليها
وان تعدوا نعمة الله لا تحصوها
و أما بنعمة ربك فحدث

تحياتي

وفاء بركات يقول...

أهلا محمد
ولا تزعل نفسك بلاش حسونه ده
اللي مزعلك .. روح لعم جوجل وصحح الأسم...
بس تصدق انك وصلت لبيت القصيد وطبعا
كلام شيخنا الجليل رضي الله عنه صح ميه في الميه ..والحمد الله أدى إحنا عايشين
الف حمد والف شكر ..
خلاص بقه نسيت الحله وصحبتها بس بفتكر كل ما حد يتبطر علي الأكل أويتأنف
ربنا يتولي الناس برحمته ويقدر القادر
ويدله علي فعل الخير
وبعدين يامحمد باشا مفيش أسف ولا حاجه
وراح أسجل الكلمه في قاموس فنجليش وده قاموس كنت عملاه أيام الدراسه
للكلام اللي ملوش معني
لك كثير من السلام والإحترام..

NoNa يقول...

فعلا احلى اكل تكليها انتى جعانة مووت

جوعتينى يا استاذة وفاء انا جوعت دلوقتى اعمل اية بقى مفيش هبر دلوقتى
^_^ هههههههههههههههههه

Unknown يقول...

صح ياأستاذة
اعوذ بالله من الجوع
ولكن لا اعلم فعلا
هل الجوع كافر
والعياذ بالله منه

وفاء بركات يقول...

الأبنه العزيزه نونا
أهلا بيكي بعد هذا الغياب الطويل عن المدونه وان كنت دائمة السؤال عني تلفونيا ربنا يجازيك بكل خير
أن كان علي الهبر أهرها بسيط نجيبلك هبر
وربنا ميجوعكيش ابدا..
تحياتي لك وللأسره الكريمه

وفاء بركات يقول...

السلام عليكم ورحمة
الله وبركاته
أهلا د.نور ربنا مايحكم علي حد بالجوع
وأظن إن مقولة الجوع كافر ترجع لأن الأنسان ممكن يسرق أو يكدب أو حتي بأكل الميته ليسد جوعه والله أعلم
شرفت بالزياره والتعليق..تحياتي

DoNyA يقول...

هههههههههههههههههههههههههههه

ممكن هنا نقول مرايه الجوع عاميه ولا ايه لدرجه انكم اصلا مشفتوش مين اللي جاب الاكل ولا ليه

بس اكيد مواقف مش هتتنسي طول العمر

وفاء بركات يقول...

أهلا بيك دنيا
كانت لحظه قاسيه علينا وقفت تفكيرنا
لإن البيت كان فيه مكرونه وأرز وبطاطس
وعلي رأى ماما الله يرحمها لو طلعتو السطوح حتلاقو بيض الفراخ ... وبابا الله يرحمه يقول هو صحيح النفس الحلوه ليها الجنه بس مش لدرجة حلة أم ؟؟؟
طبعا هات ياتريقه لمدة شهر وأكثر
بس برضه أحلي لحمه كلتها في حياتي...
تحياتي يادنيا