الجمعة، 9 يناير، 2009

من أرشيف حياتي(نموذج لأم فاشله)

إسمحو لي أن أقدم لكم هذا النموذج لأم فاشله وأعتذر عن التسميه وأرجو من حضارتكم بعد





قراءة الموضوع إن وجدتم عنوان غيره تقترحوه علي فأنا مستعده للأخذ بيه فورا





ونبدأ الكلام بذكر النبي عليه الصلاة والسلام ॥





هي صديقه لها ثلاث بنات كنت بزيارتها وكانت تشكو لي من أعباء المنزل والمجهود التي





تعانيه في ذلك ॥ فقلت لها وأين بناتك؟............ قالت بناتي ملهمش في هذا الموضوع





موضوع آيه ياستي حتي لو كل واحده فيهم اهتمت بغرفتها أو غسل ما تستعمله من صحون وأكواب





أو تقسيم أعباء البيت عليكم وخصوصا أنهن انتهين من الدراسه ॥ فقالت خليهم يفرحو بحياتهم بلاش





يعتلو الهم من دلوقت الأيام جايه كتير وعلي رأى المثل بنات الشاطره خايبين وبنات الخايبه شاطرين





قلت لها يافرحتي بيكي ॥ وفي هذه الأثناء دخلت البنات وسلمو عليه فإذا بالأم تقول لهم شفت تانت وفاء





عايزاكم تساعدوني في البيت ... فإذا بإحدهن وكانت أجملهن وقالت لالا وألف لا ياتانت يعمل حسابه





الأكل تيكاويه والماتيك موجوده وغسالة الأطباق وشغاله صنع مصر زى بعضه مش حقول فليبنيه





قولت لها كسبنا صلاة النبي ... طيب لو ربنا رزقك بأطفال راح تراعيهم إزاى قالت أحدى أخوتها





لو مافيش داده يبقي ياماما أو مامته يقوموبالمهمه دى ..... إلتفت الي الأم التي كانت تسمع كلام بناتها





وهي عامله إعلان كيرست وجهها ينطق بالسعاده وتقولي مش بقولك مكبرين دماغهم هههههههههههههههه





أخر دلع قلت في نفسي دول أخر خيبه وستأذنت للإنصراف قبل ضغطي مايرتفع أكثر ماهو مرفوع ॥





مرت الأيام وتزوجت بناتها وحده تلو الأخرى ...॥ولم يعدى أسبوع إلا وجرس التليفون وإذا بها علي





الطرف الاخر تطلب طلب مني الحضور حالا لحل مشكله لأحدى البنات وسوف أسرد لكم مشكلة كل واحده منهن





علي حده





البنت الكبرى زوجها يشتكي من أهمالها في البيت وفي العيال وحتي في نفسها ... وبيشتكي من كثرت طلباتها دون





النظر لوضعه المادى وعدم الإحساس بما يعانيه لتوفير مستوى معيشه جيد فهو يعمل بإحدى المصالح الحكوميه ويدير



مشروع خاص به ॥ والمطلوب منه عند عودته من يوم عمل شاق أن يشيل الأولاد ويغير لهم وينتظر حتي تعد الطعام لأنها





مشغوله مع الولاد طول اليوم॥فما كان منه غير الشكوى للأم التي قالت بناتي مش واخدين علي المرمطه॥ فقال لها





بنتك عندك لما تاخد علي المرمطه بيتي مفتوح ..... عندما تحدثت مع الأبنه قالت لي انه مش فتي احلامها وأنه بيئه





قلت لها يعني أيه مش فتي أحلامك ؟ .... ردت كنت اتمني زوج يفسحني يخرجني ناكل بره ... يهتم بيه وبأولاده





قلت لها وتقصدى أيه بأنه بيئه ؟ .... أنه دايما صوته عالي ونرفز ... ... قلت طيب حسألك كم سؤال وردى بصراحه





فيه حد أفضل منه إتقدم ليكي نظرت لى وهزت رأسها بالنفي ...... عرفت شباب أحسن منه قالت بصوت منخفض أيوه





طب متقدموش ليكي ليه؟..... قالت كل ليه أسبابه ... قلت لها إسمحي لي أن أخمن تلك الأسباب أن يقول مثلا انا بحبك وربنا يعلم





قد ايه انا بتعذب اني مش قادر أتقدم ليكي ظروفي الماديه متسمحش ... أو أبي وانا في خصام دائم لقد رشح لي فتاه ومصر





علي تزوجي منها وإلا طردني من البيت أو يحرمني من الميراث وكم دمعه وحبة شحتفه ويتركك وأنتي تبكين حبه وتسهرين





لياليه ويسمعك مثلك لها أمير يسعدها يجعلها ملكه تجلس علي عرش قلبه ويخدمها من حولها الأيدين الجميله دى لاتلمس غير





الورود وتعزف علي عود الأذن هذه لاتسمع إلا كلام الحب والهوى هذه العيون لاترى إلا كل جميل في هذا العالم ....





وأنتي تسمعي دون أن تفكرى ... مسألتيش نفسك هو عمل أيه علشان يستمر هذا الحب سعي لإيجاد عمل ليجمع لك المال دون





الإحتياج المادى لوالده وحتي يشعر والده بأن لولا إن هذه الفتاه تستحق العناء مافعل أبنه هذاويلين ويعيد التفكير في موضوع الإرتباط....




مفكرتيش ليه محاولش






يقنع والده بشخصك حتي يوافق علي زواجكما ... لأنه بكل بساطه كان غير جاد وكنت بالنسبه له مجرد واحده بيتسلي بيه



بدل كيس لب اللي بيحب بيعمل المستحيل من أجل من يحب اللي تعبك عقد مقارنه بين من عرفتيهم وزوجك وطبعا لم تكن



في صالح الزوج المطحون ... سؤال آخر هل زوجك عصبي ونرفز طول الوقت ... قالت لي بصراحه لأ بس الأوقات



اللي بيرجع فيها من الشغل ومليقيش أكل معمول والعيال مش نضاف وأنا مبهدله بيزعق ... قلت الحاله دى بتتكرر كثير



قالت للأسف أيوه قلت محاولتيش تنظمي وقتك أو تستعيني بمامتك بأن تحضر يوم في الأسبوع تحضرى فيه طعام الأسبوع



وتضعيه في الثلاجه أوتتركي الولاد عندها وتقومي أنتي بهام بيتك كما قولتي لي يوما بأنك سوف تستعيني بماماتك أو حماتك



في رعاية الأولاد ... قالت بصراحه عرضت الفكره دى علي ماما قالت لي أنتي كده حتفتحي عليه فتحه كل واحده من إخواتك



تجيبلي ولادها وأعيش انا في مورستان ....قلت لها يعني الراجل يشيل الطين طول النهار علشان يوفي طلباتك انتي وعيالك



ونهار ميلقاش لقمه يكلها ولا راحه في بيته ويقول جاااى يبقي بيئه ونظرت للأم وقلت لها أيه رأيك في بنات الشاطره ....



دلعي بناتك ماشي بس فهميهم إن بيت الأب حاجه وبيت الزوجيه حاجه تانيه انت في بيت ابوك بتدلعي علشان لست مسئوله



مسئوليه كامله عنه لكن بيت الزوجيه انت مسئوله كزوجه وكأم عرفيها إزاى تدير بيتها مسكيها مصروف البيت خليها تدخل



المطبخ وتعمل أكل يبوظ وتعرف غلطها ومرره علي مره تتعلم علميها إزاى تتعامل مع أهل زوجها وخصوصا الوالدين والأخوه



تسأل عنهم وتودهم بنتك عامله زى اللي مايعرفش العوم ومره واحده لقي نفسه وسط البحر ذنب بنتك في رقبتك



البنت الثانيه الحلوه حبتين تزوجت من جارلهم نفس مشكله الأبنه السابقه ويزيد أنها ترد علي زوجها كلمة بكلمة ودائما تقول له



انت مش من مستوايا انت دبلوم وانا مؤهل عالي انا محدش شافني إلا وقال لي بقي الجمال ده يعيش العيشه دى طبعا



بيتطور الأمر لمد الإيد وهناك عيب أخر فيها انه محذر عليها الإختلاط بالجيران وخصوصا أنهم في غربه لكنها لاتسمع الكلام



من كثرت مشاكلهم الأهل بيحملو هم حضورهم وتتصل بزوجي لكي يفضي نفسه تماما عند حضور إبنتها في أجازه



قلت للأبنه يابنتي في وحده عاقله تقول لزوجها انا كثيره عليك وأيه بقي حكاية انه دبلوم ما انتي عارفه انه دبلوم مؤهل أيه ابو



سنتين بتاعك ده ماهو دبلوم برضه وبعدين إختلاطك بالجيران بحدود في مناسبات وبإذن زوجك وعيب قوى إنك تردى علي



زوجك كلمه بكلمه ولازم تضعي في إعتبارك ظروفه قبل ما يدخل بيته فانتي لا تعلمي ما يتعرض له من مشاكل في العمل



ليه توصلي زوجك لمد الإيد انتو في غربه لازم يكون فيه طريقه مهذبه ومحترمه لتعامل مع زوجك .... من خلال الحديث



مع الزوج ووالدته فهمت شيئ خطير إن الزوجه الجيران ووالدتها يصتنعان المشكله فتغضب الزوجه ,الزوج أجازته قربت



تخلص عاوز يصالح زوجته الزوجه لا تتصالح إلا بهديه من الذهب ويالها من مساومه تسقط من قدر الزوجه وخصوصا



إن الزوج لا يبخل عليها لا بالمال ولا بالذهب ॥



كلمت الأبنه أمام والدتها بأن لامانع أن أسمع نصيحة أمي ولكن ليس فرضا علي أن أعمل بها إن كانت في غير صالحي ॥



وإن كنت تعايرين زوجك بأنه مستواه العلمي أقل منك فالأحرى لكي أن تميزى مايقال لك من نصائح وخاصه إن أمك غير



متعلمه وأفكارها محصوره في كيف تستخلص أكبر قدر من المال من أبيك كحصن لها من غدره في يوم من الأيام ...



قلت لها هذه وجهات نظر تختلف من عقليه لأخرى كل ما أعرفه إن مادام هناك أولاد يجب أن نكون أكثر حرصا علي الأسره



أكثر مسئوليه أكثر تضحيه لأجل حياه سعيده الي حد ما مستقره.....



لاأخبي عنكم إن كلماتي هذه نزلة علي الأم كالصاعقه وأخذت مني موقف لأني وضعت كل اللوم عليها



الأبنه الثالثه ... هي الي حد ما مرتبه في بيتها لها ثلاث تجارب زواج التجربه الأولي زوج ثرى



بعد حوالي أربعة أشهر من الزواج كانت فيهم مسار حديث القريب والغريب الذهاب الي أشهر الكوافيرات لبس شيك ماركات



سياره فارهه هدايا ذهبيه أصبح لها حساب بالبنك وهوب سمعنا بأنها طلقت وبالسؤال قالت أنه كان عاجزا علي أداء حقوقي



كزوجه طب ليه عيشتي كل هذه الفتره معه أو ليه لم تعطي له فرصه للعلاج قالت كثرة شكه خنقتني ففضلت الطلاق .....



علمت بأنها قبل طلبها الطلاق أحضرت مصاغها بحجة إرتدائه في فرح قريبه لها وإفتعلت مشكله لمت معها



كل منقولات المنزل حتي كان الزوج يستعطفهم لترك فرش والدته لإستعماله الشخصي ولكن دون جدوى .....



الزواجه الثانيه سألنا عن الزوج وجدناه غير كفء تعددت مرات زواجه له من الأبناء ثلاثه وبنتين


يقال إحدى زوجاته ماتت مقتوله علي يده والله أعلم ॥وإن العائله ملفها حافل بما لاتحب سماعه أو تراه... بلغنا الوضع للأب الذى قال



البنت قالت عاجبني واحده مطلقه مين يعني حيفكر يتزوجها










بعدها إتصل الأب بزوجي إستعجله في الحضور وعلم زوجي بأن الزوج مرشد للمباحث ويتاجر في المخدرات وأنه يعرف ستات॥ وحاجات ما



تتقلش وتم الطلاق البائن الذى لا رجعة فيه.... وعادت محمله بمنقولاتها وعند زيارتي لها وجدتها تسخر من حالها وتقول



لإمها ولا يهمك يا قمر أنا ح ملا بيتك عفش وح صيغك ياجميل وتضحك الأم وتقول لها وهي تنظر لي شوفي ياختي البت



هو إحنا في أيه ولاأيه ... كثر الكلام عليها فسافرت عند اقاربها بالقاهره ولم تعد إلا لتحضر جنازة والدها




وتزوجت بعد وفاة والدها وجاءت لتضع مولدها وبدأت المشاكل إبتزاز الزوج فرض شروط

علي الزوج ليتم الصلح ورفض الزوج الخضوع لطلاباتهم


محولات زوجي وكل من تدخل باءت بالفشل تم الطلاق


وما زالت المشاكل قائمه حتي تاريخه...



هل لديكم عنوان أخر لهذه القصة الحقيقيه هل انا متجنيه علي الأم




هناك 13 تعليقًا:

fashkool يقول...

اول تعليق .. زى المدونين ما بيقولوا ويهتفوا .. أول تعليق
انا ممكن اقول لك عنوان .. وهو ...
بنات الليل مدهون بسمنه يطلع عليه النهار يسيح .. او ممكن
زوجات اونطه ... او ممكن
ليه يا بنفسج مش بتبهج
يا ستنا وفاء .. دول بنات عايزين يتجوزوا من رجال الحور .. هو فيه رجال حور فى الجنه برضه ..
تحياتى يا ستنا

من غير عنـــوان يقول...

أولا برافو على هذا الموضوع..

منذ بداية عصر الإنفتاح الإستهلاكي( على فكره أنا مع الإنفتاح الصح) المهم حصل إن الناس حاولت تعوض سنسن الحرمان .. وبدون دخول في تفاصيل.. قاموا الأهالي بتدليع الأولاد على الآخر.. وكانت البداية لما قريب صاحبي سقط في الإعدادية.. جابوا له كاسيت عشان مايزعلش( 1977) . بعد كده طلعت موضه إن الأهالي يصرفوا على العيال لما يتجوزوا (1988) . وبعدين طلع إن االخايب في المدرسه يدخل جامعة خاصه (1999).. ثم مش مهم.. سيبك منه وأنا أجوزك سيد سيده (2005)
وزاد الطلاق..
أثناء ده.. حصل إن العالم أصبح قريه صفيره وإتفرجنا في النت على قصور الأمراء وأفراح السفهاء...وبقت كل بنت متخيله إنها ست الحسن.. ومن حقها قصر وفلبينيه وعربيه كوبيه... ومع أخذ رأي أستاذ المؤرخين حسين مؤنس رحمه الله.. نجد أنه تم سلب الإراده المصريه تماما من الأسواق.. وتبقي الدلع البايخ..وجاء هذا مع سفر الأهالي للخليج والمكاسب الغريبه اللي بقت موجوده من الرشوه وخلافه..

من هنا بــــــاظت الدنيا وإتقلب العدل.. أتعوج...

الواد لازم يدخل حضانه بالدولار... البنت لازم تلبس من المحلات المشهورة... في واحد معرفه جاب عربيه حلوه مراته أصرت ان البنت تركبها عشان العريس يعرف مستوانا... والأب ركب زقزوقه موديل 70

المهم إنت فتحتيني على بلاوي أهالي هذا العصر..

الدين ثم الدين

وأقصد هنا صحيح الدين.. مش جلابيه ونقاب.. ومعاملات زفت وزفت.. وتطكالب على الحج والعمره مرات ومرات وقريبه مش لاقي تمن العمليه ومش حأقول جاره مش لاقي ياكل ولا الساعي بتاعه مش لاقي يتجوز

كدب... نفاق.. أنانيه

انعدام الحب

انعدام ان الأسره تاكل على سفره واحده

عز العز ان البنت مش بتشيل الريشه الحرير في بيت أبوها

رزم تجيب لبسها من أوروبا وأبوها مش لاقي ياكل... يقوم يسرق... والشيطان يقولوه ده بيزنس

صاحبي بيصلح عربيو ولاده الرجاله اللي كل شحط فيهم أطول من أبوه.. وقريبتي بتودي الأكل لبنتها كل يوم... و الكثير بيشتروا راجل وبيعملوا الزفاف كله على حسابهم + الشقه... المهم إن الولاد بيحبوا بعض ... بلا خيبه...
البنات اتدلعوا والولاد أكتر...التربيه انتهت انتهت انتهت

أنا شفت بعيني ولد 8 سنوات بيضرب أبوه على وشه والأب بيقول ( كمــــان)

المهندس الله عندي ما تعرفش تعمل نسكافيه لنفسها...
بنت صاحبي مش عاجبها مرتب 400 في الأول عشان الشغاله بتاخد كده... العيال 9 و10 سنوات بيسهروا للصبح..

وبعدين يقولك مافيش ضرب... طب ما إجنا اتضربنا...والحمد لله اتربينا

والإعلانات كمان يا وفاء... مودينا في داهية...

والماركات العالميه العبيطه

وحلم الشاب الصايع ( لا مؤاخذه ) اللي عايز يشتري مرسيدس وهو ما حلتوش أجرة المايكروباص...

والكلام في الموبايلات بالساعات مع رجاله كبار في السن وشويه دلع عشان يشحنوا ...

كمان الأفلام.. حلاامي أصبح مليونير.. شاب فاشل بي بيحبها والدنيا كلها بتصقف لما الفرح يتم.. الفيلات والشغالات... واعربيات وعمليات التجميل...

مدرسه بكذا ألف وجامعه بكذا كذا ألف... وبعدين عربيه والواد يموت على المحور...

طلاق بعد 4 شهور لمعظم اللأفراح اللي بيتغني فيها مغنيه درجه تالته وبتاخد 20 ألف...
ودعوة الفرح من الفضه

جوايز 0900 اللي كلها نصب وقمار...

لأ وكل عيل ماطلعش من البيضه لازم لاب توب


وينوبك ثواب ما تفتحينيش أكتر من كده


والله لو قلتي لحد

ومانيل المطالب بالتمني
ولكن تؤخذ الدنيا غلابا

حيقولك


يعني إيه


أمنياتي بأمل أكبر في أحفاد أحفادنا

وفاء بركات يقول...

حضرتك بتشرف المدونه سواء أول تعليق أو أخر تعليق.
صدقني انازعلانه عليهم وعلي بنات كثير زيهم وزعلانه من أمهات كثير خلطو بين الدلع وعز بيت الأب
المشكله في غياب دور الأب أو راجل البيت
الحاضر الغائب ..
شرفت ولك تحياتي

وفاء بركات يقول...

أهلا ياباشمهندس محمد
رد حضرتك كمل الموضوع وطرح سلبيات دخلت حياتنا علي غفلة منا
المشكله إن إحنا عارفين وجعيتنا
وبنأويح والأمور إتلخبطت وكل واحد
عجبه عقله ..وليه لأ في عصر الفتاوى التفصيل وعلي رأى حضرتك النت وما فيه
نورت ووجود حضرتك بالمدونة يسعدني
كسعادتي بموضوعات مدونتكم البنائه التي تقدم النصيحه بشكل مبسط أدعو الله
أن ينفع بها شبابنا ويجزيك كل خير
تحياتي..

DoNyA يقول...

انا شايفه ان حضرتك مش متجنيه خالص علي الام
بالعكس
الام هي اللي جنت علي بناتها التلاته

والقصه دي مش حاله استثنائيه ولا عابره دي حاله متكرره ومنتشره وبالاخص في الطبقات المتوسطه والفوق المتوسطه
ويارب يستر علي بناتنا كلهم
وربنا مع امهم اللي زمانها حامله الذنب والهم كله دلوقتي

وفاء بركات يقول...

أهلا دنيا
انا بدعي من قلبي إن ربنا يصلح لهن الحال ويتولاهم
ويقوى الأم علي هذه المشاكل وينور بصيريتها
تحياتي

norahaty يقول...

السلام عليكم ورحمة
الله تعالى وبركاته
العنوان مضبوط واقل
وصف لهذه الام هو (الفشل)
تدونية شافية وافية بمعنى الكلمة
والله ياأستاذة ومش غريبة ولا نادرة الحدوث ولكنها وللاسف كتير والاسباب كتير
لكن والله اعلم انا باعزو كتير من مشاكلنا الاجتماعية لسببين
اساسيين 1)عمل الام الزوجة
و2)سفر الزواج لوحدهم
للعمل وترك البيت
فى رعاية الام فقط
وربنا يخليكى لنا
وتدوم تدويناتك
يارب

وفاء بركات يقول...

السلام عليكم ورحمة
الله وبركاته
للإسف الأم هنا ربة منزل متفرغه ..
ولكنها خلطت بين عز بيت الأب وتحمل المسؤليه و إبتزاز الزوج ماديا شرطا لإستمرار الحياة الزوجيه .ربنا ينور لها بصيرتها ويهديها
تحياتي

واحد من العمال يقول...

أشكرك على الطله البهيه
التى أنارت مدونتى العماليه المتواضعه

----------

الموضوع رائع
ولم يتناوله أحد من قبل

وأقترح عنوان تهكمى لهذه التدوينه وهو

***( أمهات المستقبل تيك أواى )***

---------

وسعدت بزياره مدونتكم وسأعود لأستكمال
جولتى فى أرجائها
ومدونتك حتنور قائمتى للمدونات الصديقه بجد

ودمتى بخير

وفاء بركات يقول...

أهلا بواحد من العمال في مدونة
بنت واحد من العمال أهلا بواحد
من الذين نفخر بإنتمائهم الي
هذا البلد الطيب وهذا مالفت نظرى
حب حضرتك لمكان عملك والتسويق والدعايه له من خلال مدونتكم ..
دليل علي هذا الإنتماءالذى نحتاج
اليه في هذه الأيام...
أشكرك حضرتك كلك ذوق والمدونة منوره بأصحابها ويشرفني إضافة مدونتي عندكم
وفي إنتظار مروركم الكريم .
وعملا بمبدأ الديموقراطيه سوف أنتظر
لتجميع أكبر عدد من العناوين وطرحها
علي المدونين لإختيار العنوان المناسب
تحياتي

Simbawy يقول...


ماما وفاء ..
متعة حياتي اني اقعد جنب واحده من عماتي أو خالاتي واسمع منها حكاوي ونصايح من دفتر يومياتها ..

صدقيني بجد حاسس اني فعلا عايش يوم من الايام دي وانا بقرأ موضوعك ده

ربنا يخليكي ويديكي الصحة يارب


نرجع لموضوعنا وان كنت ارى ان الاصح هو : بنات الخايبه خايبين :D

الراجل مهما كانت حالته المادية أو منصبه الوظيفي أو شهادته التعليمية يسعد أيما سعادة ولو بكوباية شاي من ايد زوجته

وكوباية الشاي دي بتكون عنده ألذ ألف مرة من الف كوباية شاي شربها من الف ايد

الزوجة اللي بتدرك ده بتغرس أول بذرة سعادة في حياتها الزوجية .. وبالتالي أول بذرة سعادة في حياة ابنتها (زوجة المستقبل)

يمكن الزمن اتغير والمعيشة بقت صعبة والزوجة أصبحت تشاطر الزوج تكاليف وأعباء الحياة .. لكن تبقى الزوجة الحكيمة هي اللي تقدر ترسم السعادة على وجه زوجها ولو بكوباية شاي .
وبكوباية الشاي دي هتشرب الهنا وراحة البال .

ما بالك لو كانت كوباية الشاي دي بلبن او جنبيها كرواسون او حتى طبق لب ههههههههه

الفكرة كلها في اهتمام الزوجة بزوجها وبيتها ، حتى ولو بامور قد تراها هي بسيطة لكنها عند الزوج تكون عظيمة .

صديقتك يا ست الكل هيا اللي جنت على بناتها ، زي حكاية الدب اللي قتل صاحبه من فرط حبه ليه .

وطبعا البنات كبروا وهما هوانم زمانهم ، وكنتيجة طبيعية اولادهم هيطلعوا أنيل وتتواصل سلسلة الفشل


ملهاش حل غير ان الام ربنا يديها الحكمة بقى وتدي بناتها كورسات من أول وجديد في الحياة الزوجية وان كنت اشك في مدى استجابتهم لانهم خلاص .. من شب على شيئ شاب عليه

وربنا يكمل بناتنا وابنائنا بعقلهم ويرزقهم الزيجة الصالحة ويوفقهم للخير يارب

صباحك فل يا ست الكل

تحياتي ،،

وفاء بركات يقول...

أهلا أبو حميد
ياعم تعالي وأنا أسمعك حكاوى للصبح
وماشى أعملك كوباية شاى وجنبها كروسوان وباتيه لحد متلاقي بنت الحلال..
المشكله إنها أقنعت نفسها انها وبناتها مجني عليهم ومالهم حظ ربنا يعينها ...
وربنا يخليك ليه يارب وأفرح بيك وإنت عريس ربنا يعطيك كل ماتتمناه.

الحقيقه المصريه يقول...

ياريت تيجي وتزور الحقيقه المصريه وتشوف احنا وصلنا لايه عمالين كماشه عليا يا باشا لكن ربنا معانا ان شاء الله http://elhakika.blogspot.com/