أولا كل عام وحضرتكم بخير عيد سعيد عليكم أجمعيين وعلي أمة سيدنا حبيبنا محمد عليه أفضل الصلاة والسلام

طبعا وحشتوني وده أقل تعبير ممكن أقوله .. ويعجز كيبوردى عن التعبير عن معاني حبي وتقديرى لكم أصدقائي

الأعزاء وربنا يديم علينا نعمة الأخوه والصداقه التي احسد نفسي عليها ...

في خلا ل فترة التوقف عن التدوين أستوقفتني مواضيع وأحداث دسمه كنت ناويه تكون محور الحديث بيني

.

وبينكم وفعلا فيه مسودات بخصوص هذه المواضيع المشكله في عدم العرض أسلوب طرح الفكره وكيف اصل

بمضمونه اليكم بشكل يحوز رضاكم .....

الفتره مابين شهر رمضان والعيد الكبير كانت دسمة الأحداث وكانت هناك ظاهره مثيره لللإنتباه ألا وهي

التراشق بالإتهمات عبر الفضائيات وعرض صارخ لفضائح نجوم مجتمع سواء كانو رياضيين أو فنانيين

ده غير المشاكل العاديه اليوميه كإرتفاع فواتير الكهرباء بقالهم أربع شهور مولعينها وتسأل يقولك تصافي

الصيف حسب الله ونعم الوكيل ... وحادث القطار وإقالة وزير المواصلات

لكن بجد اللي حرك عتدى الإحساس بالكتابه مباراة مصر والجزائر وانا هنا لست بصدد الحديث عن فنيات

وتشكيل برغم عدم رضائي عن تشكيل فريقنا القومي .... ولكن عن الأحداث التي سبقت المباراة الأولي في

القاهره والفاصله بالسودان ... وتعبير قيل كثيرا من الساده المسئوليين إحنا إتعملنا مع الحدث بحسن نيه علي

علي إعتبار ان دى مباراة كرة قدم وحتعدى ... يختي ياجمالو حسن نيه اللعيبه الجزائريين ومعاهم وزير الشباب وورمرامه

كسرو اتوبيسهم وشهدوا علينا الفيفا وخدو تعهد من السيد حسن النيه رئيس إتحاد الكره الموقر وإحنا لم نصور لهم

تحطيم الفندق ومطار القاهره ولا صورة علمنا وهم بيحرقوه في الأستاد بتعانا قدام عنينا ..... وأتوبيسهم وهو يتجول في

شوارع القاهرة وألسنة لاعبيهم تخرج للشعب المصرى وإشارات وقحه بالأيدى أين فضائيتنا طبعا مشغولة بوصلات

الردح وتصفية الحسابات ..... وفي السودان كان السيد حسن النيه سفيرنا المبجل يعلم تماما بشراء الجماهير الجزائريه

الأسلحة البيضاء من الأسواق السودانيه ولكي ريح نيته بلغ هذا الحدث للسيد حسن النيه المسئول عن تنظيم المباراة

المصرى وشاف وسمع بإن رجال الأعمال الجزائريين بيأجرو أماكن للإقامه لجزائريين سواء فنادق ولا شقق لتفويت

الفرصه علي الجماهير المصريه في إيجاد ملجأ لهم ده غير شراء التذاكر المعده للسودانيين وكذلك الأعلام الجزائريه

التي إفترشت مباني السودان وتلقفتها الأيدى من بعض السودانيين وكذلك تأجير الميكروبسات ولف شوارع السودان و

دراستها وطائرات القوات الجويه الجزائريه التي نقلت الجماهير كده وكده يعني كل ده قبل المباراة بأربع أيام

و‘حنا مقدمين حسن النيه وجرايدهم نازله أكاذيب وإحنا عمالين نتكلم وهما يخططو وإحنا بنشتم في بعض بين مهدئ وبين

مشعلل ويفرحة طنط ظاظا فينا جنازه جتلها فرصه تشبع لطم علينا وأكلت الجزائر ومحرضيها لينا والعالم الحلاوه

وصرنا شعب تافه مشاغب من أجل مباراة كوره بالكذب والتلفيق وإحنا دورنا علي البرامج الفضائيه ندور علي صوره

تتضمن غلطه لجمهور الجزائر أو فريقه .... لم يكن هناك متابعه من أى قناه رياضيه مصريه ترصد تحطيم أتوبيستنا

وترويع جماهيرينا أوأى مسئول سئ النيه يجيب حد من الفيفا يشوف بعينه المهزله دى ولا حد مسئول يتابع محاضر المصريين

ضد الهجامات الجزائريه عليهم ... حسن نية أيه ونيلة أيه دى إللي إتصابنا بيها في جنوب أفريقيا إتسرقنا وبحسن نيه مبلغناش

وإتفضح فريقنا بسبب خوفنا علي جنوب أفريقيا من أجل كأس العالم .. والجزائر صحافه سوده ونية أسود .

وبرضه مقدمين حسن النيه

معرفش ليه انا ربطت هذا الحدث بهزيمة 67إستخفاف إهمال تواكل سوء إدارة هرجله كان نتيجتها إمتهان للمواطن المصرى

وللعلم المصرى وطبعا هناك ضحكه صفره علي مآلة إليه العلاقات الجزائريه المصريه وأيضا سوء فهم شاب بعض الأخوه

في السودان عندما تحدث البعض عن ضعف الإمكانات الأمنيه للتعامل مع الحدث ... وتسؤلات عن سماح مطار الخرطوم

بإستقبال طائرات حربيه خاصة بعد بداية المبارة ....

معرفش كده فيه هاجس بيقولي مش يمكن إسرائيل بتجس النبض للشارع المصرى والحكومه المصريه وبتشوف مدى

تعامله مع الأحداث والنظره البعيده لعواقب الأمور ... باين كترت في اللحمة وعملت دماغ فته طب أقول لحضراتكم

مع السلامه بقي أروح أشد البطانيه وأقول لكم تصبحو علي خير

كل سنة وأنتم طيبين

رمضان كريم كل سنه وأنتم طيبين



وبحياتكم راضيين ومتطمنين



مدوينات ومدونين

كل سنه ونيل بلادى يروى الأرض الشراقي

تطرح سنابل محبه ناكل منها مسلمين ومسحيين

ومن نبع واحد نملي قلتنا نشرب وإحنا متهنين

محمد وجرجس فاطمه وتريزه عبدالله وكرستين

ملامح واحده لودققت حتقول دول مصريين

الوطن لينا كلنا ولله العظيم الدين

كل سنه ومن أول السنه دى وإحنا وكل أمة سيدنا محمد صلي الله عليه وسلم

بخير وطيبين

والعالم كله في سلام والناس آمنين لحد آخر السنين

كل عام وحضراتكم بخيربمناسبة حلول شهر رمضان الكريم

تهنئة

تهنئه من القلب الي صاحبة مدونة إبنة أبيها




تمنياتي لها بحياة زوجيه سعيده



وربنا يستر كل البنات ويعين الشباب علي نفقات



الزواج



ويقدر كل من الشباب والشبات علي تحمل



مسئولية الزواج لبناء مجتمع أفضل

http://www.eshraqtfagr.blogspot.कॉम



مولد مدونة جديده




إشراقة فجر في إنتظار زيارتكم لها


/

كانت صاحبتها إختارت أسم إبتسامة أميره ثم أسمتها إشراقة فجر




وأى تسمية لاتعني غير عنوان المهم المحتوى الذى أتمني أن ينول رضاكم



ويهمها ويهمني رأيكم

مشاعر متضاربه

حكتب من قلبي نثر شعر حكتب وخلاص ... حكتب عن أيه عن مشاعر جوايه

بتخبط في بعض مش عارفه انا بجد فرحانه ولا زعلانه حقيقي إحساس غريب ومحير

كل إحساس فيهم بيشدني بقوه إليه عيني بتبكي وفي نفس الوقت بسمه علي وجهي !!!!

قلت لنفسي شويه شويه فكرى وتعقلي الموقف وإرجعي كام سنه ورا شوفي كنت بتتمني

إيه كنتي لما بتجيبي مسدس لعبه ليه كنت بتقولي له ده علشان تضرب بيه إسرائيل وترجع

المسجد الأقصي ..... إفتكرت يوم مإشتريت ظرف ليلتحق بالكليه الحربيه كنت فرحانه قد إيه

ولما مقبلش زعلت طب ليه دلوقتي ببكي ,... مش علرفه حتي بعد م رحت انا ووالده وأخواته

علشان نزوره في معسكر التدريب وحسيت بالتغير في شخصيته وقد إيه الجيش عمل فيه اللي

مقدرتش أعمله طوال 22سنه محمد كان وقته مش منظم مهرجل كان غير منتظم في الصلاه

كان عصبي ومفيش حاجه عجباه لقيت عكس كل ده ...

أول م دخلت بصيت في الطابور أدور عليه كلهم لبسين زى بعض ومتحمصين من الشمس

جرى علينا إترميت في خضنه علشان انا قزعه وهو إسم الله عليه طويل بكيت بحرقه علشان الجمعه اللي فاتت

لظروف خارجه عن إرادتنا مقدرناش نزوره وفكرت ساعتها ياترى إيه كان إحساسه وهو وحيد

في غرفته وزملائه مع زويهم بالخارج حلف ياماما والله مزعلتش ولا حاجه زملاء كتير أهلهم

مجوش ...كنا وخدين أكل معنا علشان ناكل معاه محدش مد إيده علي الأكل بقينا نزق الأكل في بقه

وهو يضحك ويقول إيه ده مينفعش معدتي أخدت علي كميه أكل معينه مش قادر, نديله عصيرو شويه

هب أكل إلا أن قال أبوالعيال مش يالا بقي إنفجرت في العياط بس بس لسه بدرى انا أولي بخمس دقائق

أقعدها مع إبني والجدع يسكتني ومحمد وخدني في حضنه ويقول وبعدين بقه متخلنيش أضايق بكائك

بيتعبني مشيت وانا طول الطريق بدعيله هو وكل زملائه ربنا يحميهم ويحفظهم من كل شر .....

وبرضه ببكي أصله وحشني قوى وحشني منكفته فيه وخناقنا مع بعض علشان الجهاز انت قاعد من بدرى

معلش صحابي مستنيني علي الشات وانا أعند فيه لأ حفتح المدونه ونفضل نشاكس في بعض

صدقوني مفيش حاجه ليها طعم حتي المدونه بدخلها بالعافيه ॥

ربنا يرجعه بالسلامه॥

إتصلت بأولاد صديقتي المتوفاه رحمة الله عليها وسألت عليهم وكنت بصبرهم وبسألهم عن أحوالهم

وفي نفس الوقت بتحامل علي نفسي حتي لايختنق صوتي وأقلب المواجع مش بقول لكم مشاعر

متضاربه ॥

ربنا يطمنكم علي حبايبكم ويرد كل غائب لأهله ويبعد عنكم كل شر..

لاأنسي أن أوجه شكرى للقوات المسلحه المصريه صانعة الرجال علي توفير أوتوبيسات لنقل

الأهالي داخل معسكر الزياره وأماكن الإستقبال ... أما الأهالي ربنا يسامحهم علي عدم النظام

في ركوب الأوتوبيسات والتزاحم رغم وفرتها وأيضا سوء إستخدام دورات المياه وعند لفت نظر

أحداهن قالت قطعين المياة نعمل إيه يعني طبعا فهمتو قصدى إيه

تصبحو علي خير

من كل قلبي شكرا لله

من كل قلبي شكرا لله الذى وهبني صديقه عزيزه احبتني وأحببتها في الله لم أراها ولم تراني

ولكن كان بيننا حوار فكرى هي بكل ما لديها من علم ومعرفه حباها الله بها فهي الطبيبه المثقفه التي

لاتبخل علي أحد بما تعلمته وهي المسلمه المتدينه التي تبسط تفسير الأيات وبعض الأحاديث وتقدم لنا

نبذه عن أمهات المسلمين والصحابه رضوان الله عليهم وهي الإنسانه رقيقة المشاعر وعذبة الكلام لها

قلب ينبض حبا للناس فأحبها الله فأحبها كل من عرفها ويشرفني أن أكون أحد من عرفها .... وأنا الأمه

الفقيره الي الله بكل خبرتي في الحياه وبثقافتي المتواضعه دار بيني وبين هذه الإنسانه الرائعه حوار روحي

ومحبه أحمد الله عليها إنها حبيبة قلبي الدكتوره نورهاتي أو نور حياتي كما أحب أن أسميها॥

أشكرها علي تذكرها يوم مولدى وعمل إحتفاليه جميله بدأتها بتقديمي الي زوارها الأعزاء

كانت كلماتها بلسم طابت به أحزاني وألامي ...سعدت وفرحت كما لم أفرح من قبل , وكانت

ردود أفعال زائريها وتعلقاتيهم مصدر غبضتي وقد أدمعت عيناى من تلك الكلمات البسيطه الصادقه

والمشاعر الفياضه التي أحاطني بها هؤلاء الأعزاء وكيف لايكونو أعزاء لقلبي وهم أصدقاء هذه العزيزه

الغاليه وأشد ما أثرفي كلمات الأبن مانو والأبن صاحب مدونه عبد من عباد الله وهم أصدقاء مدونتي ॥

وتلك الكلمات الرقيقه التي مست القلب من الأخرين فأقل ماأقوله جزاكم الله عني خير وأدخل الله علي قلوبكم

وقلوب من تحبونهم الفرح والمسره وكفاكم الله شر المرض وأنعم عليكم جميعا بنعمة الصحه والعافيه॥

أما حبيبة قلبي ونور حياتي الدكتوره نور هاتي

فلها مني كل ود ودعوات بدوام محبتنا وأن يمن الله عليها بكل

ماهو طيب وينعم عليها براحة البال ويسعد قلبها وتهنأ برضا الله عنها وعليها

شكرا لك عزيزتي حبيبتي صديقتي وأختي في الله د। نور هاتي

فلو علمتي ما فعلتيه بي بهذه اللمسه الرقيقه منك التي سعد بها قلبي وتلك الكلمات التي علق

بها حضرات السيدات والساده الأفاضل من زائريك الكرام وفي هذا التوقيت التي فقدت فيه صديقه

عزيزه علي بعد مرض عضال رحمة الله عليها وعلي أموات المسلمين أجمعين ....

وسفر محمد إبني لقضاء الواجب الوطني في القوات المسلحه مع العلم بأني فرحانه انه جند

لأني أعلم أن الجيش سوف يقوى شكيمته وإن هذه التجربه سوف تفيده في حياته وتضيف له

كثيرا من الخبره وتفتح له مجال للتعرف أكثر علي الحياه برغم من كل هذا إلا إن الأم في تبكي لبعد

الأبن ربنا يرجعه بسلامه ويطمن كل أم علي ولادها

حتي عندما فاجأني الأولاد بعمل عيد ميلاد يوم 13في الشهر قبل سفر محمد بيوم ومحولاتهم إسعادى

ومحاولتي برسم بسمه علي وجهي حتي لا أزعلهم ولكن بداخلي كان هناك حزن علي رحيل صديقتي

وقلق علي محمد وخصوصا أنه إنفي ومش بياكل أى حاجه ومش بيحب الباذنجان وبيقولو إن دى الوجبه الرئسيه

في الجيش وأبو العيال بيحاول يطمني لكن هيهات لدموعي أن تتوقف ...

وعندما دخلت أبنتي هبه المدونه ووجدت تلك الإحتفاليه أسرعت في طلبي وصدقوني تغير حالي وكان

لها وقع غريب في تغير حالتي المزاجيه من حزن الي سعاده

أسعد الله من أسعدتني هي وكل من شاركها وجزاهم الله عني كل خير

مارأيكم في إ‘بتسامة الأميرة

إبتسامة الأميرة صديقة إبنتي هكذا أرادت أن يعرفها القراء بهذا الإسم

أقدمها لكم من خلال مدونتي لتتعرفوا عليها من خلال كتابتها وهي في إنتظار

تقييم حضرتكم لها فإن لاقت كتابتها تشجيع منكم سوف يكون لها مدونتها الخاصه

وعن نفسي انا لن أتدخل بإبداء رأى في ما تقدمه بل ستكون مدونتي وسيط بين إبتسامة الإميرة

وبينكم.....

والآتي بعد واحد من خواطرها:

أضعت نفسي وأضنيت جهدى في حلم زائف وأمل تائه أسلبت دمعي وأرهقت فكرى

وبقلب باك وجسم خاو جئت خوف وحيره وعذاب

انا الذى وقف في قلبي الزمان في حيره ما بين مستقبل وماضي وآن لايحركه شئ ولا يسكنة مكان

كرهت الضلال وذقت المراروتهت مابين الجبال جبال الأماني سئمت تكرار الكلام ,,وجف من قلبي ينبوع الحنان

لتحل مشاعر غريبه عن كبان من انا ؟॥ سؤال يحيرني وفي ليلي يسهرني انا ذاك الإنسان جميل الملامح

صافي القلب طلق العنان ... أم انا جاحد النعم خسيس الخلق أعيش بلا حسبان ؟!!!!!

مهم جدا رأيكم لاتتأخرو علي إبتسامة الأميرة فنحن نشجعها لكي تكون لها مدونتها الخاصه

مصر

مصر

الف ثالث والف رابع وكتير هقولها

والله بحبها وكل اللي بيحبها باكل فولها

وأملي آكل بغاشها

بحبها وبموت فيها وبنعل أبو خاشها

ولما أبعد عنها قلبي يئن ويقول بحبهاأقد

ثواني عمره اللي حيعشها واللي عاشها

بحبها لو لبستني حرير ولو لفتني في خيشها

وكنت بتمني لو ينضم النسا لجيشها

أشيل سلاحي وأضرب عدانا في نغشيشها

علشان ماتشم ريح بلادى ولا تفكر في يوم

بالسلاح تناغشها

واللي يدوس علي طرف مصر تطير

رقبته بجد مش بهوشها

مصر هي البقيه كلنا بنروح وبنيجي عليها

ترابها في الدنياشايلنا وفي الأخره طوينا

هي سترنا وغطانا اللي في الشتا يدفينا

ولما بشوف زويلها وتريكها وأعلامها

بتروح مني أى دمعه حزينه

ولو مرت عليها ضيقه بدعي

ليها ربنا ينجيها

مهما أقولك سنيني

بيغنوا غرام ليها

ولسه عندى أمل تكون سلة

غلال الدنيا وما فيها

أم الدنيا بالطول والعرض

وجنودها خير جنود الأرض

والرب حاميها وبيراعيها॥

كلمة حق

كما ننشر السلبيات علينا أيضا البحث عن الجانب المضئ لنرى بصيص من الأمل



تم الإبلاغ عن سرقة موتوسكل إهتمت الأجهزه الأمنيه ببالبلاغ وبالبحث والتحرى تم



ضبط العصابه وبحوزتهم 21موتوسكل منهم 11موتوسكل تم سرقتهم من إدارة المرور


وكانو محجوزين لحين إنتهاء أصحابهم من إستخراج رخص القياده وهذا تم في خلال ثلاث أيام بالتقريب


بصيص من النور يعطي أمل في الحياه أنظر الي النصف المملوء من الكوب ... راح أحاول

من ارشيف حياتي(موضوع مازال تحت اليد) 2

موضوع أخر لم يدخل الأرشيف بعد ॥ الا وهو الغش


ماذا يكون حال مجتمع الغش فيه عند الكثير من افراده حق مكتسب والدنيا كلها بتغش هيه جت علينا



الكارثه إن اللي بيشجع علي الغش الأباء نصدقوا ! وأيضا المدرسين ؟!



كنت معديه من قدام مدرسه إعدادى ولقيت واحده ماسكه في خناق واحده وبجوارها بنت كده تقريبا أولي إعدادى



وناس كتير واقفين يسمعوا الحديث ولأن المدرسه دى فيها صديقه لي لما روحت إتصلت بيها وسألتهاعن الخناقه ؟



قالت لي متشغليش بالك إحنا خلاص اخدنا علي كده ।



ياستي دى أم طالبه كانت بتدى لبنتها درس عند مدرسة الفصل بشرط تنجحها !! البنت جابت ملحق



فالأم بتعاتب المدرسه علي إنها خزلتها ومنجحتش البنت زى بقيت المدرسين ॥ والأبله نقول لها اديها نمره علي ايه



دى مش حله حاجه خالصِ ....وهي لو فالحه كنت أديتها درس عندك شاطره بس تلهفي الفلوس كل


أول شهر ॥وإسترسلت صديقتي في الحديث وهي بتضحك وتقول أهم حاجه إن زمايلنا عيبو الأبله


لإنها أخلت بالإتفاق ومنجحتش الطالبه , وكان الحكم بإن المدرسه تنجح الطالبه في الملحق وبس خلاص ।



قلت لها بس خلاص إزاى دى بجاحه من الأم وإنحلال والمدرسه والمدرسين فاسدين دى كارثه



لما الأم تدافع عن حق بنتها في الغش ولا إبنها إزاى دول يربو الأجيال القادمه ॥


الغش يعني كذب يعني بجاحه دى مصيبه سوده لما العيال مش لاقيين مثل أعلي ليهم لافي البيت


ولا في المدرسه حيلاقوه فين علي النت ولا علي الفضائيات ...


ردت صديقتي وقالت سؤت عليك النبي بلا ش المثاليه القاتله بتعتك دى اللي مش بتأكل عيش في الزمن ده


إعملي معروف خلي الناس تعيش .... قلت لها تعيش علي دم بعض علي قوت بعض نخرج جيل من الحلانجيه


والهباشين وحبه فهلوه ده في أى دين وفي أى مله ومش حقول قال الله وقال الرسول علشان مسمعمش انتي


حتعملي فيها شيخه نفكر في الموضوع علي المستوى الإنساني والأخلاقي الجيل الجاى حيبقي معندوش مثل عليا


دى حتبقي غابه البقاء فيها للأقوى .... قالت لي الصديقه ياسلام ولإحنا عايشين فيها دلوقت آيه متكونش الجنه وانا


مش واخده بالي القعده في البيت عملتك فراغ فبقيتي بتعملي من الحبه قبه...


انتو شايفين اللي بيحصل دة حبه ولاتل من الحبوب ومازال الملف تحت اليد الله وحده أعلم متي سيحفظ


في أرشيف حياتي

من أرشيف حياتي ( موضوع مازال تحت اليد)

موضوع مازال تحت اليد أقصد انه لم يدخل الأرشيف بعد لأنه حديث وهو جزء من حالتي المزاجيه

المتوتره , وسبب من أسباب همي البعض يتهموني بإني بكبر المواضيع وأنا أرى ان هناك أشياء صغيره يجب

أن نكبرها لكي نرى المستقبل مش حطول عليكم ।

من حوالي أسبوعين زارني أولاد صديقه ॥

واحد في القبول والثاني في خامسه إبتدائي دار بيني وبين الصغرين هذا الحوار

ياترى بتذكروا كويس ؟ الرد: يعني

ياترى عندكم خطه للأجازه ؟ اللي في القبول وقتي حيكون بين النادى والنت

الصغير قال لي انا معنديش وقت أفكر في الأجازه انا كل فكرى إزاى اخلص ثأرى من الواد

اللي قاعدة جنبي في الفصل كل مجاوب علي سؤال يعمل حركات تلخبطني وتضحك الفصل عليه

ولما أشتكي للأستاذ مش بيهتم ورحت للناظر قال حقول لرائد الفصل ومحدش خد حقي ...

قلت له حتاخد حقك ‘إزاى قا ل لي بأى طريقه انا بفكر أضربه بقطر داريت خوفي وحاولت

ان أتماسك هو شيل القطر سهل كده ؟! يا طنط ده فيه مطاوى وأمواس أمال ندافع عن نفسنا إزاى

قلت لو سمعت الكلام ده من حد في مدرسه عاديه جائز مع إني ضد الفكره لكن انتم مدرسه خاصه يعني

رعايه أفضل من الناحيه التربويه والعلميه ... آيه انتي بتتكلمي زى بتوع التليفزيون ॥

قلت له الموضوع ده شغلك لدرجة إنك مش مهتم تقضي أجازتك الصيفيه إزاى وطبعا وخدك من المذاكره

الموضوع مش مستاهل التفكير فيه قال وكرامتي وشكلي قدام صحابي في الفصل عايزاهم يستوطو حيطتي

آيه الكلام الكبير ده من طفل عنده حوالي حداشر سنه وأيه كميه العنف دى وأيه اللي يخلي طالب يضع السكين والقطر

مع القلم والكتاب وهل المدرسه كمؤسسه تربويه وتعليميه تحولت الي وكر لإشبال وبراعم من القتله والمتشردين

هل مهمة المعلم أن يخرج علمه للطالب وكأنه أعزكم الله واهو هم وإنزاح فين دور البيت

والمدرسه أين التناغم بين الأثنين من أجل جيل المستقبل لما مدرسه بها أبناء للأباء وأمهات متعلمين ومثقفين

يحصل فيها كده أمال المدارس الحكوميه المكتظه بالطلبه ومنهم من سكان العشوئيات لأباء غير

بيحصل فيها آيه

أين لغة الحوار بين الأسره ليه مفتش شنطة ولادى بحجة أني بشوف الوجبات أو بطمن علي السندوتشات أى حاجه متلفتش

نظر الأبن إني بدور في شنطته علشان ميستعملش ذكائه في إخفاء إشياءه الغير بريئه ... أوعندما ألاحظ أبني مهموم

أحاول أن أخرج الكلمات من فمه لمعرفة مايضايقه بأمانه بالرغم من صعوبة الحياه فأنا أييد تفرغ الأم لأبنائها لو كان العمل

حيأثر علي مستواهم العلمي أو علي تربيتهم لأن آيه فايدة أني أوفرلهم المال ومستوى معيشه مرتفع وأنا لاأعرف مشاكلهم

ولا ألاحظ التغير في السلوكهم ولا أتابع مع المدرسه لمعرفة مستواهم العلمي ॥

وأين دور المدرسه التربوى والتعليمي ॥ رائد الفصل في مدرستي الحكوميه كان بمثابة الأب والقاضي

والصديق بجانب دوره كمعلم ॥

الخطوره في تفكير الطفل أنه ياخد حقه بدراعه علشان مفيش حد حياخد حقعه............. وقفه كبيره

مع إلتفاف حول النفس ॥ شعرت بغمامه وشئ ثقيل علي صدرى كيف سيكون مستقبل هؤلاء ؟؟؟

ربط بين ماسمعت من هذا الطفل وما شهدته بالتليفزيون من حوادث قتل يقول البعض إنها لاتمثل نسبه كبيره

طب وليه الحوادث دى تحصل من أصله وليه نستني لما تكبر

شاب عنده سبعتاشر سنه يخلص مشكله يتغز بالمطوه

أثنين إخوه يقتلو واحد في الشارع ويهددوا الناس بالقتل وينتظرو الشرطه بكل فخر دون خوف آيه الجبروت ده

لصوص تسطو علي البيوت في عز الضهر ॥ ناس بتتقتل في بيوتها بالجمله ॥

برنامج فضائي موضوع حلقته الوضع الأمني يحتاج لترخيص السلاح للدفاع عن النفس؟

حوالي 80في الميه أيدو ترخيص السلاح لأن الشارع المصرى أصبح غير آمن ولا حتي البيت

المصرى ... حزنت ياخبر الي هذه الدرجه ذهب أجمل حاجه كانت تميزنا كشعب الأمن والأمان

ورجعت للخلف منذ حوالي عشرون عاما ولوقت قريب كنا نسمع صوت صفارة عسكرى الدوريه

وكحته العاليه ومين هناك هذا العسكرى أعاد لجارتي غسيلها المسروق من علي الحبل علشان كان فيه

لبس مدارس بعد ان ساق الص للمركز بباقي الغسيل ॥ ترامي الي ذهني الخياله وهم يمتطون الجياد يمرون في الشوارع

الجنابيه يتقدمهم ظابط وكانو عند عودتنا من قضاء أمسيه خارج المنزل يسألونا إن كنا بحاجه ليرسل معنا عسكرى

لأن الطريق مظلم ...

أوذلك الظابط الشاب الذى يقف بجوار عربية الشرطه ليحافظ علي أمن الشارع وهو يداعب أبني وهونائم في عربته

قائلا أيوه ياعم نام انت أخر تمام وإحنا نسهر طول الليل ويبادل وزوجي الضحك ذهبت هذه الروح كنا زمان لما حد يتاخد

حقه يقول حروح للحكومه تجيب لي حقي أيه اللي حصل من تجارب شخصيه بنتي إتسرق منها غويشه ذهب

في ميكروباس ذهب أبني يبلغ كان رد الظابط الكبير قوى اقعد كده معاها يمكن تعرف واد ضحك عليها

وخد الغويشه كان الرد مفاجأه لأبني الذى خرج من عنده ليتصل بواحد من أصحابه يعرف عالم لبط

وجمع سائقين السرافيس

أللي علي الخط وعرضهم علي البنت

فلم يكن اللص من بينهم وعند ما وصفت السائق ومابان من السيده اللني كانت معه( كانت تردى نقاب ) والتي قامت بالسرقه

عرفنا أنهم من محافظة الفيوم وبقالهم أربع شهور في البلد وإنهم بينتقلو بين المحافظات وبيقومو بالسرقه والمنتقبه هذه

ماهي إلا رجل حمدنا ربنا إنها جت علي الغويشه وإستعوضنا ربنا

واحد معرفه هجم الصوص علي بيته وسرقو ذهب وفلوس وضربو زوجته وهدودها بقتل طفلتها لوصرخت

راح يبلغ الشرطه إتقال له نفس ما قيل لأبني أضرب عن الطعام ووصل الموضوع لجهات أعلي ووصل مندوب

من الداخليه وحقق في الموضوع بجديه وتم القبض علي الجناه ।

دلوقت صاحب الحق هو المناصب والفلوس هو اللي دراعه أقوى منطق الغاب البقاء للأقوى

الموضوع كبير قوى وخطير قوى وبكره لو فضل الحال علي كده حيبقي صعب قوى قوى

ياترى انا كبرت الموضوع وعاوزه ازعل وخلاص ... ياترى أشيل ملف الموضوع ده في الأرشيف

ولا أسيبه مفتوح للمناقشه ... طب لو سيبته للمناقشه آيه اللي بإيدى أعمله لبكره أحلي من النهارده