الأحد، 30 نوفمبر، 2008

هو آيه اللي بيحصل ده

هو آآآآآآآآآآآآيه إللي حصل ؟
لإن فرص العمل في محافظة بني سويف قليله والأجور أقل

أتصلت بأبن خالتي بالقاهره يلحق أبني محمد أخر العنقود بالعمل

بدار النشر التي يملكها ومحمد خريج إدارة أعمال ولديه خبره

بصيانة الكومبيوتر وحاصل علي عديد من الدورات ....

ولأنها اول مره بعاد ومحمد سنه الأن 21لايعرف عن الحياه غير بيتنا و

اصحاب يملكون سيبرا يقضي فيه أبني أكثر من 20ساعه يوميا

ساعات نومه 4ساعات فقط وهذا كله دون مقابل غير احساسه انه واقف وقفة رجوله

مع أصحابه حتي عندما فكروا في الأجر كان حاجه تضحك 80جنيه

ومن هنا كان قرارى أن يعمل أبني بالقاهره وفي رعاية خاله

وكنت أتصل بيه في اليوم حوالي أربع مرات زى الأنتي بيوتك

ده غير إتصال اخواته بيه للأطمئنان عليه ....طبعا كانت حالتي

النفسيه صعبه عندما أضع الأكل أسأل نفسي ياترى هل أكل ولا لسه

وأتصل محمد كلت أيوه ياماما متشغليش بالك بيه انا كويس ....

بالليل لو حسيت بشوية برد أتصل انت نايم ياحبيبي ... أيوه ياماما

متغطي كويس والله العظيم ياماما متغطي .....

بعد مرور أسبوع سافرت أبنتي له لإعداد الطعام له ووضعه بالثلاجه

مع سخرية خالها منها آيه ياجماعه أنتو حسستوني بإن الواد في غربه

أيه كميه العواطف اللي تخنق دى ...سيبوه يعتمد علي نفسه ......

رجعت ابنتي وطمنتي عليه الأسبوع الثاني طلبت منه الحضور وده كان يوم

الخميس 27نوفمبر ركب من المنيب الساعه 6مساء علي الساعه ثامنه إلا الربع

إتصل بصوت يشبه الهمس الو ماما ॥ أيوه عامل أيه وانت فين دلوقت।


انا كويس إديني أختي بسرعه أعطيت الموبايل لأخته وركزت علي ملامح بنتي

قطبت مابين الحاجبين وظهر علي وجهها الفزع ... وقالت إ قفل دلوقت وأنا حتصرف

قلبي وقع في رجلي وارتميت علي أقرب كرسي وليس علي لساني غير أستر يارب أنا شحتاهم

منك يارب حافظ لي عليهم ... البنتين حاولو يهدوني وقالت ابنتي الكبرى والتي تحدثت معه

دى حاجه بسيطه أرد يابنتي وشك وانتي بتكلميه بيقول غير كده ابني حصل له آيه؟


مفيش حاجه ياماما الموضوع إن سواق الميكروباص جابهم من طريق الشرق الجديد وعلي بعد 25كيلو من


بني سويف قال لهم الأجرة12جنيه ولأن الأجره 8جنيهات فقط والمعروف ان السواقين بيطلبو 10


جنيه فقال أبني هي 10جنيه بس وتحمس شاب وقال انا مش ح دفع غير 10جنيه ... وقف السواق


ولبس بونيه حديد في إيد ومطوه في الإيد الثانيه وراح ماسك في رقبة الشاب ودى بونيه ودى مطوه


في الوقت ده محمد اتزحلق لتحت وقد كان جالسا علي الكنبه الخلفيه وإتصل بنا ..... لأن مفيش واحد من حوالي 13راجل


قدر يتحرك من مكانه ...ويقول للسواق انت بتعمل ايه!
وقال مفيش حاجه قال انتي مستنيه ايه اخوكي في خطر
إعملي معروف السكر والضغط يعلو ياماما وتبقي مشكله
سكر اااإيه وضغط آيه انا في المصيبه دى انا عايزه إبني



في نفس الوقت قمنا بالإتصال بكل من المعارف من الضباط والعساكر وأمناء الشرطه .....


وإنتظرنا مكلمه أخرى من محمد لنعرف أخر التطورات قال هامسا قال السواق بيقول انا حعرف


اخد حقي منكم إزاى ومازال رقبة الشاب بين زراع السائق الهمام...ولا حراك للساده الركاب


المهم قال شاب أخر موجود بصوت عالي ياجماعه ماتقلقوش أخ موجود معانا إتصل بي اقاربه


من الضباط وبعتو عربيه نجده ..... ماهي إلا لحظات وترك السائق رقبة الشاب المسكين


وقد تلطخت ملابسه بالدماء ....وقال السائق ياجماعه انا قلب ابيض انا مش خايف من حد


هي ساعة شيطان ... الأول اودى الأخ ده المستشفي وانا تحت امركم حوصل كل واحد فيكو لغاية بيته


نسيت احكي جاء زوجي من مشوار علم بالخبر فتح درج المطبخ واخد معاه سكين وجرت الإبنه الكبرى


مع أبوها ومعها قصافه وطار زوجي بالسياره مسرعا ... إتصلت بأبني الكبير وهوأكبرهم وعلمته بالخبر


ولأن مديرية الأمن أمامه فذهب للإبلاغ فلم يجد إهتمام ... ياجماعه انا محامي وجي ابلغ عن واقعه حصلت



وعايز حد اتكلم معاه॥ أصل مفيش حد هنا ॥ حاضرة الصول بيقول

إستعدإبني لطلب رقم سأله حاضرة الصول


النوباتشي وحتتصل بمين بقي قاله بالعميد فلان ...قام حضرة الصول النوباتشي مؤديا التحيه


الباشا في أسوان إحنا نقوم بالواجب ياسعادة البيه هوقريب سعادتك ...رد أبني معرفه وثيقه وزى


متقول كده نسب وأبقي محامي العيله اى خدمه علشان الباشا معرفه انا في غني عن خدماتك


وأستقل إبني سيارته ومشي بها في طريق الشرق الجديد ولم يلاحظ دنو البنزين علي النفاذ


جائه إتصال من أخته خلاص إحنا دلوقت علي الكوبرى والميكروباص أمامنا


أبني الحمد الله تصدقي البنزين علي وشك يادوب يرجعني ......


كل ده وأنا قلبي قلقان علي الجميع وأدعو لهم بالعوده سالمين .......


ورجع الجميع بفضل من الله العلي القدير وحمدالله علي سلامتهم....


دون تحرك أحد من الركاب بعمل محضر أوإتخاذ أى إجراء أو حتي الإستعداد


للإدلاء بالشهاده ....وجائنا تليفون من القسم بأنه تم تقفيل المحضر


وحتي لم يذهب أ حد للإطمئنان علي الشاب المصاب الذى اصر السائق الهمام أن يوصله


للمستشفي بنفسه حتي ولو كان هذا علي حساب نفسه ولم يعلم أحد هل أدلي الشاب في المحضر


بما حدث وأتهم السائق بالإعتداء عليه؟ الإجابه أشك



ولي أن أسأل ماذا حدث للناس حوالي 13شاب لم يكن بهم ولد شارب من لبن امه يهجم عليه


ماذا لو طلع عليهم قطاع طريق وهذا الطريق مظلم وصحراء وقطعهم ولامن شاف ولا من درى


ليه منلتزمش بالتسعيره ... وليه المرور ميفتش السائق والعربيه لتأكد من عدم وجود أسلحه


بيضاء وخلافه حتي لو كان حجة السائق الإحتفاظ بها للدفاع عن النفس


ليه أنا إكتفيت بالإطمئنان علي ابني ... ولم يذهب احد منا للإطمئنان علي الشاب المصاب
آيه السلبيه دى حتي مني
وأرجع للمقطع الأول هل لهفتي وخوفي علي أولادى مبالغ فيه وعدم احتكاكهم بالحياه
وخصوصا الإبن الصغير يعد خطأ في التربيه والمفروض اسيبه يتكحرت بالغة العصر
وإلي متي ستظل محافظات الصعيد طارده لأبنائها لعدم وجود فرص عمل مناسبه
أسأله كثيره شلة تفكيرى ومازلت أشعر بأنني سلبيه إذاء هذا الموقف وأشعر بالتقصير في حق أولادى
فلم أعلمهم فن التعامل مع هذا الواقع الذى لاأعرف له وصف وكيف أعلمهم التعامل مع هذا الواقع
أنا أعاني من جهلي بفن البلطجه وأخذ الحق بالدراع ॥وأفضل المشي بجانب الحيط وقول لها داريني
مثلي مثل كثيريين من ركاب المكروباص قصدى من المصريين
وسأل نفسي هو آيه اللي حصل؟

النكته إكتشفت إن زوجي واخد معاه سكينة السفره وبنتي وخده قصافه ليس بها غير مبرد

آيه الحلاوه دى قوات كوماندوز ॥ ايه الهنا اللي انا فيه ده معايا شبيحه في البيت .....

شوفتو الهنا اللي انا فيه حتي وإحنا عايزين ندافع عن نفسنا مش عارفين آيه هي الأداه

المناسبه ؟ قدآيه إحنا أغلب من الغلب والغلب يقف لنا إحترام....

ممكن تجوبو عليه هو آآآآآآآآيه اللي حصل ؟

هناك 6 تعليقات:

Simbawy يقول...



حمدلله على سلامتك يا ست الكل

وحمدلله على سلامة محمد ربنا يخليه ليكي

والحمد لله جت سليمة ..

نرجع بقى لموضوعنا .. هوا فيه ايه ؟ وايه اللي بيحصل ده ؟

فيه ان الحكومة فرضت مبدأ ان اي حاجة هتمشي بالقوة عاجبك ولا مش عاجبك

فيه ان البلطجية فهموا اللعبة وعرفوا ان اللي تحت هوا اللي بينداس .. ولا حد هيحس بيه اصلا


فيه ان الناس قتت ارزاقها وضاقت اخلاقها بقت تفطر وتتغدا وتتعشا سلبية سلبية

فيه ان البلد بقت زي السمك الكبير بياكل الصغير .. ومن زاوية اوسع هنلاقي الكل بياكل في بعضه

فيه ان المفتريين بيزدادو افترا والغلابا بيزدادو غلب الكبير مش مرتاح والصغير مش مرتاح والكوسا زرعت وفرعت وعلى كل لون يا باطيسطا

فيه ان الحكومة مش بتاخد لحد حقه .. بقى الكل بياخد حقه بدراعه ومفيش مانع انه ياخد اللي مش حقه بالمره .. مهي ميغا

عرفتي بقى ايه اللي بيحصل يا ست الكل :)

ربنا يصلح الاحوال ويستر على عباده ويهد كل ظالم

خالص الود ،،


وفاء بركات يقول...

يارب تسلم من كل شر
ولا يحرمني من سؤالك عليه اللهم أمين
ابني العزيز سيمباوى اتمني لك مستقبل
سعيد وأتمني ان تتحقق لك كل م تتمني
انت وكل شباب المسلمين اجمعين
دمت لي

norahaty يقول...

السلام عليكم ورحمة
الله تعالى وبركاته
حاجات كتير اوى اتغيرت فينا ياأستاذة
الشهامة والمروءة والنخوة والهمة وكتير من كلمات (قاموس مساعدة الغير)اتمحت من ذكرتنا ولا ادرى لهذا سبب واتبدلت بكلمات تانية من نوع(ياعم كبر-هو احنا اللى حنصلحها! -فكك منى !وغيرها)يمكن من التجارب الكتير والاحباطات المتوالية مع السلطة بأجهزتها المختلفة
مش عارفة !لكن اللى عارفة الحين فى بلدنا ان استطعتى ان تحلى اى مشكلة لكى (بأى طريقة )واكرر (اى طريقة)فحليها انتى ولا تنتظرى ولا تلجئى لاى جهة (رسمية )للمساعدة وكذلك لا تنتظرى مساعدة اى جهة رسمية لحل اى مشكلة لكى ان انتى استغثتى او استعنتى بها
(بلدنا بقت غابة )وللاسف والالم الشديد

وفاء بركات يقول...

السلام عليكم ورحمة
الله وبركاته
والله دى حاجه تحزن يعني بدل من ربي ناس متعلمه محترمه نطلع بلطجيه ...وبدل ولادنا متشيل كتاب تشيل مطوه..
وحنعلمهم ده إزاى واحنا غير محترفين إجرام ...بدل ميخدو كورسات لغات وكومبيوتر يخدوا كورسات تشرد
أنا مش متخيله ... علي قد الرعب اللي كنت فيه ...ضحكت علي ادوات
الدفاع عن النفس اللي زوجي وبنتي
خدوها معاهم لزوم التشرد ..وإبني الكبير وهوبيقول انا فلان المحامي وجي اعمل بلاغ ..والطناش وأول مجاب سيرة باشا بقي أى خدمه سعادتك ..
طيب الناس المتربيه تعمل آيه في الغابه دى .... ربنا يتولانا
تحياتي

من غير عنـــوان يقول...

أولا حمدا لله على سلامة ابنك وربنا يبارك لك فيهم جميعا

وجت سليمه الحمد لله

الجزء الأولا من القصة.. هو في الحقيقة مهم... يعتمد على نفسه..والحارس الله
الجزء التاني عبارة عن ضياع الشهامة بين الناس.. وده من سيئات هذا العصر للأسف

حماهم الله جميعا

تحياتي

وفاء بركات يقول...

من غير عنوان
الله يسلم حضرتك من كل شر....
والحمد لله علي كل شئ ...وربنا يحمي ويحفظ
كل الشباب اللهم أمين.
ويعدى الأيام دى علي خير..وترجع أيام
الزمن الجميل مش بعيد علي ربنا
شكرا للمرور ..تحياتي