مبروك وألف ومليون مبروك للأهلي مجلس إداره , جهاز تدريب لعيبه
وجمهور كل شئ جميل منظومه واحده تعزف لحن أسمه نادى الإنجازات
لاأنسي عندما كنت صغيره وكان النادى الأهلي يتعرض لعثرات لدرجه انه
مره اتغلب من المصنع الحربي أونادى السويس 6صفر وبكيت بحرقه
واخذ أبي رحمة الله عليه يهدئني ويقول الرياضه غالب و مغلوب المهم ان الإنسان
مييأس ويصلح أخطاؤه عمر الواحد ميعرف الصح إلا لوشاف فين الغلط .....
وعلمني إن أحب ناديه وفي نفس الوقت أشجع اللعبه الحلوه ....
فوز مشرف بدون هزيمه علي مدى البطوله وكان ختامهامسك للأهلي علي غير أرضه أمام القليل
من جمهوره لكن بعون من الله
عز وجل أخذنا الكأس ......
الف مبروك لكل مصر وللأهلويه ...ونفسي الزمالك يرجع تاني مدرسه الكوره
والإسماعيلي برازيل أفريقيا ... ونفسي كل واحد في موقعه يحدد هدفه ويعمل جاهدا
علي تحقيقه
حب نفسك من غير أنانيه حب بلدك وأحلم بالأيام الجايه حكم ضميرك شغل عقلك وقبل
كل ده خاف من ربك حنفوز بألف كاس وكاس والفرحه تملا قلوب الناس ونبطل نقول
أجدادنا عملو حضاره ونتحسر علي الأمجاد حتي علشان التاريخ يقدر يسطر لأحفادنا
مجد حققناه بس ننوى نيه خالصه لربنا إن إحنا نحب بعضنا والنيل أبونا ومصر أمنا
وإحنا ولادها فرحها وهي عزنا
مبروك للأهلي الكأس مبروك لمصر لينا كلنا
هناك 5 تعليقات:
ماما وفاء ..
أنا مليش في الكورة قوي .. بعرف النتيجة من نشرات الأخبار :D
لان ربنا اداني موهبة النوم أول ما المبارة تبدأ ههههه
لكن أنا أتولدت في عيلة كلهم أهلاوية .. الحج ربنا يديه الصحة أهلاوي .. وأمي الله يرحمها كانت أهلاوية .. واخوالي وخالاتي واعمامي وعماتي ..يعني كان جمهور عائلي بكافة أعماره .
اتعلمت حب الاهلي وانا بتعلم حروف الهجاء .
عرفت الفرح في انتصاراته .. ودقت غصة الحزن في تعثراته ..
حتى لما سبت مصر كنت بتابع أخبار الاهلي ، يمكن مش بتابع مبارياته لكن بتابع مشواره ..
بجد فريق يشرف ويرفع الراس .. ربنا يوفقه
ويارب نسمع بفرق مصر كلها عامله احلى شغل ومقدمه اجمل مشاركات ومن تقدم الى اخر .. واللي النهارده الحظ مجافيه بكره يبتسم له ويفرح جمهوره بيه ..
الف الف مبروك للاهلي وعقبال ما نهنيه بالنتائج المشرفة في البطولة القادمة ان شاء الله..
شكرا يا ماما اهلاوية :D
السلام عليكم ورحمة
الله تعالى وبركاته
مبروووووووووووووك
للاهلى وللعيبة واللى حياخدوا الفلوس زى ما قلت عند تدوينة صديق اخر لكن احنا حناخد ايه ياأستاذة وفاء ومش حقد والله لكن بس تساؤل :العيال مابقوا عايزيين يذاكروا ياأستاذة
وفاء ويقولولك كلام منطقى:
انتى بتاخدى كام؟
ولعيب الكورة بياخد كام؟
انتى مين بيعرفك ويصورك فى الجرايد؟
وهم مين بيعرفهم ويصورهم ويستقبلهم؟
اهى حال من احوال بلدنا القلوبة احوالها واللى صعبان على حالها!!
أهلا سيمباوى
ربنا يحفظ لك الوالد ويرحم الست الوالده ويرحم أمواتناأجمعين ..
والله الموضوع مش فرحة نادى فاز بكأس قد مهوه فرح بإنجاز مصرى أو إنتصار
مصرى قد آيه كنت متضايقه من البعثه المصريه في بكين لما رجعة زى ما راحت حاجه تكسف
أما حب الأهلي بقه حاجه بتاعة ربنا
وبعدين مفيش مانع شجع وانت نايم بدل متقول هييييييه قول أخخخخخخخخخخخ........
سلامي وتهانيه لكل أفراد العائله بمناسبة فوز الأهلي وعقبال مهنيهم بفرحك . لك تحيات وسلامات من مامات وفاء
السلام عليكم
د. نور
يادى النور يادى النور ...لوالواحد
بص للموضوع من ناحية واحنا عايد علينا ده بآيه يبقي مش حيلاقي حاجه تفرحه أحنا بنتلكك عايزين أى حاجه تفرح وسط الكوارث والأزمات دى ...
ولو العيال عندهم الموهبه ومالو يورونا شطارتهم بس ده لايمنع أنهم يدرسو
وبعدين متفكرنيش بباخد كام وبعدين الشهره ماحنا برده مدونين قد الدنيا
وصيتنا مسمع مصر وإنشاء الله حنوصل للعالميه وناخد نوبل في التدوين
اهي حاجه نقول ليها هييييه بدل منقول
آآآآهههههههه مش كده ولا آييه
دمت عزيزتي تحياتي
السلام عليكم
لالا انا مكنتش عارفه انك اهلويه كمان بتحبى الكوره كمان
عشان خاطرك بقى هادعى لللاهلى يكسب عشان تبسطى
الف ميلون مبرووك اعقبال مره الجايه د
بس هو اخر ماتش اتغلب يا استاذه وفاء
إرسال تعليق