الثلاثاء، 4 نوفمبر 2008

حياتي من غيرك أحلي

إحساس ثاني عيشاه من غيره
إحساس بأمان وراحة بال
وعيون فرحانه وقلب حنان
إحساس بيخدني لبعيد ويجيني
ألقي الدنيا كلها في حضني
حبيت انا علشاني انا
راح أعمل كل اللي يسعد انا
***************
لكن ده مش ح ينسيني انه في
يوم كان لاغيني ومحجم تفكيرى
علي حب أناني بين لأه وآآآآهه
وانا من الحيره لوحدى حزينه
اسأل ليلي عن اخبار حبي معاه
وانا وياه كنت لاغيه وجودى
كان هو كل حدودى
دلوقت خلاص الكون بقي ملكي
وهوالماضي وانا دلوقتي
وبكره مستنيني وديني بحب
الدنيا وأملي لبكره حيوديني
أحلي حياه من غير توهه ومن غير آآآآآآآه
******************
الدنيا في عيني وضحه وبإيدى الإختيار
من غير كلمه جارحه وذل الإنتظار
راح أقولها بكل فرحه خلاص صالحت الحياه
وأعيشها ببسمه سمحه
وديني بأقول لأه زى م كنت
بقول نعم وآآآآهِِِ
وهي دى الحياه

هناك 8 تعليقات:

Maha Shahen يقول...

جميله الفكره وفى شوية أبيات وقفت عندها وعجبتنى جدا
بس عايزه تظبيط شوية اوزان وتكون متكامله
دا بالنسبه للكلمات اما بالنسبه للمعنى فخلينى أفكر
الخواطر بتتكلم عن شخصيه ترفض الخضوع بعد الأن لكن قبل كدا كانت بتخضع ليه
بسبب الحب ممكن
دايما بفكر أن الحب عايز مساواه
خضوع المرأه للرجل ميزدوش غرور أبدا المفروض يزيده رحمه وحنيه , بس شكلنا فاهمين الحب تحدى
بس ياريت وانتى بتظبطى البوست خلى الخط كبير لكن مش كبير قوى علشان نقدر نقرا الكلمات ومتكونش متلاصقه
خالص تحياتى ليكى

وفاء بركات يقول...

الأخت الفاضله نور

لك مني كل تقدير وإحترام . وشرفت بزيارتكم الكريمه .ونصائحكم الغاليه
وأتمني مداومة الزياره علما بأن الفكره واقعيه وهي تجسد إحساس تلك الفتاه الصغيره صاحبة نص العسل المر
بعد أن تحررت من وهم حب زائف لمخادع بيلعب بالكلمات ويجيد فن التسبيل

أتعشم منك أختي الفاضله ان تضعي أمامي موطن القصو رفي الأوزان
وأكو لكي من الشاكرين

يسعدني أن تكررى الزياره.

Maha Shahen يقول...

انا علي فكره مش أديبه ولا ناقده فنيه فأعزرينى انا بس بقيمها بأحساسى
لما باجى أقرا شيء من الخواطر او الشعر بحب المنظوم اللي بتكون نهاية القافيه في الاخر واحده
مش نفس الشكل لا نفس النطق
وانتى بتقرى تحسيها زي الاغنيه بكل بساطه
بس عارفه انتى عامله زيى بتمشى كويس وفجاءه الوزن يسقط منك وترجعى تعدليه بجمال من جديد
صدقينى انا مش بعرف اعدلها لنفسى علشان اعدلها ليكى انا بقدر احسها بس
لكن هى في النهايه بتختلف علي حسب المنظور ليها
يعنى انا مش بقراها بنفس طريقتك
والا كنت شوفتها متكامله زي ما انتى شيفاها
يا ريت اكون قدرت اوصلك اللي عايزه اقوله
لحسن لما الافكار بتتخبط كلها في راسى بطلع كلام غريب ههههههههههههه

عامة بدون تعديل بكره هتلاقى نفسك بتكتبى احسن واحسن ودايما في تقدم
حاولى تظبطى بس انك كل شطرين يكونوا بنهايه واحده
وهتلاقيها بقت جميله

وفاء بركات يقول...

يعني طلعتي زمل ممشياها بالبركه ...الله يرحمها أمي كانت تعمل الفطائر والحلويات مضبوطه كان الجيران لما يدوقوها وانتي عارفه أيام الزمن الجميل كانو الجيران يدوقو بعض الأكل المهم يسألو أمي عن المقادير تقولهم والنبي ياأختي بالبركه.. المهم ان إحنا بنعبر علي اللي جوانا إحنا مش طمعانين أننا نكون شعراء ولو إني بحب الشعر العربي القديم..
وربنا يعدلها ليكي وليا إن شاء الله م هو مفيش حد بيعدلها لنفسه علشان يعدلها لغيرو
أيوه كده خليكي معايا علي الخط أنا أكور وإنتي تلقفي..هههههههههه
تحياتي

غير معرف يقول...

طبعا طبعا استاذة وفاء الكلام مينفعش اعلق علية واقول غير الله هرد كمان على حضرتك برد من نفس الرد

أيوة شوفتي ناس كتير أيوة حبيتي ناس كتير
ايوة حسيتى فيهم الخير كبير
ايوة شوفتى فيهم بحور الحب المسحور
ايوة قولتى فى كل مرة الدنيا بدات تطلع من الضلمة وتخرج للنور
وفى الاخر يطلع قصادك الف سد ومليون سور
وانتى زى ما انتى مجروحة فيكى كل الكسور
ومن انهاردة خلاص هقفل عليكي باب ومفيش يوم تانى عذاب
وعيشي لنفسك مرة من غير ما تبكى مرة
فى لليل الم وكلام مع نفسك على نفسك كلو لوم وعتاب
فكرى كدة مرة هو حد فكر فيكى مرة
ما الكل مشي و قفل في وشك الباب ولا حد بص ليكى وعملك فـ يوم حسب
وسبوكي لوحدك مع أيام أمر من المر و تفكير يقفل فى وشك اى باب
كفاية بقى أحلام لغيرك وفي الأخر ينكر خيرك
و يطلع زيك زي غيرك أو مجرد شئ ينسى بيكي غيرك
كنتي مع الكل انسان يرسم بسمة بكل الالوان وتحسى غيرك قبل نفسك كمان
عشتي تحت شرط غيرك ولا فكرتي تنطقي شرط علي غيرك
تضمني بى حقك من غيرك بس كفاية و عيشي فى خيرك
و اقفلي على نفسك الباب وخبى مشاعرك من اسنان الذائب
و شوفي أيه هيحصل من غيرك
صدقيني ولا الدنيا هتقوم وتقعد عشانك ولا هتتهد يوم من غيرك
الكل هيعيش بيكي أو من غيرك وبيص من تانى لغيرك
فوقي الدنيا مشيا انتي اللي مبتمشيش وقفه مكانك مبتعشيش
و بتبكي على حظك وفي الأخر تطلعي مفيش
و متصدقيش اللي يقولك أنا ليكي هعيش لانه أصلاً زيك مفيش ومش أقدر يعيش
اعترفت ليكي يانفسى بالحقيقة و غيرها مفيش صدقيني مفيش
أرجوكي منى متزعليش عشان نقدر أنا و انتي نعيش

وفاء بركات يقول...

السلام عليكم
اولا انا مش عارفه ليه مش عاوزتعلن
عن شخصيتك وإن كنت انت نفسك اللي رديت عليه الرد الجارح في( حتي عظمنا)
ليه م إستخدمت نفس الأسلوب ده في الرد.

علي فكر ه عجبني طريقة ردك وكل كلمه جت فيه طلقات جت في الصميم والحق عمره ما يزعل بس للأسف فيه ناس كده زى حلاتي
غاوين يشيلو همهم وهم غيرهم ببقي موجوعه وداوى وجيعة غيرى وإن مقدرتش ببقي حزينه

انا بقصدش اني امدح في نفسي بس ده طبعي اللي جابلي المرض وتعرضت الي شبه جلطه مرتين علشان تأسرى بمشاكل زمايل ليه في العمل فصلو فصل تعسفي...

مقدرش بعد العمر ده كله أغير من طبعي
كنت الأول انفعالي بالتعبير عن رأى بالقول واهرى ونكت في نفسي النتيجه ضغط وسكر قلت اعمل معاش مبكر ..

وعبر عن رأى بالكتابه ويبقي فيه لغه حوار بيني وبين ناس لا أعرفهم ولايعرفوني
أشوف بعيونهم اللي غايب عن عيوني..واطلع علي افكار جديده يمكن يقدرو يفهموني الدنيا اللي فيها نكران الجميل أساس ويلا نفسي وتغور كل الناس
انا بأحترم أى زائر يشرفني بالمدونه وبرحب بأى رأى مدام التعبير عن هذا الرأى في إطار من الأحترام دون الخروج
عن حدود الأدب وليس من الضرورى التعليقات كلهاتكون بها مديح بالعكس انا باسعد لأى تعليق يوجه لي مدام هدفه
تحسين اسلوبي أو التغير في شكل المدونه للأحسن

انا سعيده جدا بفكرة التدوين وأصبح لي ناس بتسأل عليه وبسأل عليهم من غير منفعه شخصيه تواصل فكرى بين ناس ممكن يكونو اصغر مني لكن إستفدت منهم زى ابني أحمد الصباغ وإسلام ونونا والصديقه الغاليه نور هاتي ومجداويه واصحاب مدونات كثيرون ممن يقتربون مني في السن لم اراهم رأى العين ولكن احمل لهم كل تقدبر وإحترام
غير معروف علي أى حال كل واحد له وجهة تظر في الحياه..
لكن هناك مقوله أحترمها
لايستحق ان يولد من عاش لنفسه فقط
وأسمح لي بعرض ردك علي المدونه
تحياتي

NoNa يقول...

السلام عليكم

ازيك يا استاذة وفاء

على فكرة غير معروف الى رد عليكى دة

صديق ليا مش شخص الى انتى فاكره انه رد قبل كده وغلط

اما عن رده عليكى بالخواطر فا هو اصلا مش قصدة حاجة هو دايما لما بيلقى خواطر بيرد اكنه طرف تانى بيحاور بس

لكن مش قصدة حاحة اما انة غير معروف لانه مش عنده مدونه وهو اسمة بشير
هابقى اوريكى لما تفتحى ان شاء الله خواطر بتاعتة ع فيس بوك

بس انا حبيت اقولك ان شخص دة بشيير غير شخص الى انتى بتكلمى عنة

وفاء بركات يقول...

السلام عليكم
وصلت يانونا وانا في ردى قلت لو كنت انت اللي كتبت يعني ده كان إفتراض
والحمد الله جات سليمه ..وأكرر للمره
الثانيه انا معجبه جدا بما كتبه الأخ بشير وأتمني أن يتحفني بمثل هذه الدرر
وهو لو معجبنيش أسلوبه كنت نشرته بالمدونه هو كل الحكايه انه جه علي الوجع وداس جامد ..
سلامي ليك والبشير