السبت، 8 نوفمبر 2008

كبد وكلاوى للبيع

الواد شلاطه مخربش بيجيب القرش من الهوا
يمين وشمال بيهبش ووخدها فهلاوا
يعرف فين وجيعتك و إزاى يصاحبك
ويوهمك أن بإيده يشيل الهم عنك
إياك تأمن له وتسمع كلامه حتخسر نفسك
وربنا مش راح يسامحك
الواد شلاطه بيشتغل سمسار حوايج
مع الدكاتره والغلابه بيربط
يجي العيان مصرى أو بعقال أو متبرنط
طلبه جاهز ويلا شيل يلا حط ويلا قبض
الواد شلاطه ضامن حسابه وبالقليل يروح للغلبان ويأبج
ويقوله دى ناس تقيله إياك تصيح وديني ليك بظبط
والعيان المتريش خد الكلاوى وهو فرحان ومزقطط
والغلبان ديونه زادت أوجاعه وهمومه
صرف اللي خدهم ماهو فقرى من يومه
راح يشكي همه للواد شلاطه آم شلاطه بالرجل شاطه
عن وشي إبعد حد قالك تصرف فلوسك لحد م تبقي ع البلاطه
إن كنت ياأهبل هانت عليك نفسك عايزني أرق لحالك
روح وبطل عباطه
مش بإيدك تبيع حشاك ورزقك علي خلقك ونشاك
مترميش نفسك في الهلاك
نفسك وديعه حافظ عليها لعلك فهمت عساك

هناك تعليقان (2):

Maha Shahen يقول...

فعلا ليكى حق والله
ان مكناش حافظنا على الأمانه اللي في ايدينا واللي ربنا هيسئلنا عليها يوم الحساب
اذا احنا مرحمناش نفسنا يبقى ازاى نطلب الرحمه من غيرنا
جميله الفكره يا وفاء والكلمات
عايزه أشوف ليكى بقى شيء شوية بالعربى الفصحه حاولى أكيد هيطلع جميل
ومتشكره جدا لتنفيذك اقتراحى لأنه بيسهل كتير علينا كدا التعليق
ربنا يبارك فيكى وبالتوفيق دايما
أرق تحياتى

وفاء بركات يقول...

انت تأمر ياجميل ..ودايما في إنتظار نصائحك الغاليه..من ساعة مطلعت معاش مبكر وإنشغلت بحفيدى أحمد قلت قرأتي ومعاها مستوايا قل في الكتابه بالفصحي
لكن إن شاء الله سأحاول لو اني أريد أن أعرف معني أسم وجدته عندك في المدونه
وهو تقريبا الفريصاء
شكرا لزيارتك وربنا يديم المعروف