السبت، 26 يوليو، 2008

ماشي انا جنب الحيط


ماااااااااشي انا جنب الحيط

ماشي انا جنب الحيط وبقول لها داريني

راضي بالقليل مدام بيشبعني ويكسيني

جه ابن الآيه استكتر عليه قليلي

واللي بخده منه بشمالي يخطفه من يميني

جلدي اشتكي منه عضمي وتللمت من الركنه سكاكيني

من إلت اللحاليح نسيت إيدي جيبي وإتحطت علي جبيني

مش علشان تقرا المكتوب عليه لكن من الفكر اللي هريني

بخاف لحد يلوم علي حالي وبكلمة يأذيني

آآآآآآآآآآآآآم إبن الآيه قال لإيت لك حل إعمل قرض

جبت التايهه يعني وأعمل آيه في فوايده لما تكويني

يانحله لأنا عايز عسل منك ولا عايزك تقرصيني
اجيب منين قسط القرض وانا أنضف من الصيني

مقصدش الصيني اللي غزا إنتاجه بيتي ودكاكيني

أقصد نضافة الصيني بعد م تغسل من مية نيللي

ونيللي ده ميته كانت بتحيني وترويني

دلوقت بخاف من تلوثه يعديني

فين أيام م كنت أ قلع الزرعه امسحها في الهدمه

وأسمي وبالهنا تنزل مريه وتغذيني

دلوقت بغسلها وبالخل أنقعها وثاني أغسلها

علشان اكلها ادوق الذل وآهي ماشيه وبتعدى سنيني

قلت راح أعيش علي الهواآآآآم ابن الآيه قاللي ودي تفوتني

عكرتوهولك بسحابه سوده وراح تعمل آيه بقي وريني

قلت له اعمل آيه اكتر من أني ماشي جنب الحيط وبقول لها داريني

قال انا عندي لك حل عروض موت حلوه وجريئه

ممكن تموت غرقان تركب مركب أو عباره ونقوم لك فيها حريقه

أواركب قطر ينقلب بيك ويقولو حد شد الجزره اللي جريت

ورا طبق سلطه فيه طماطم وفلفله تولع في البوء حريقه

ولاأستخبي في عجل طياره

تقع م يبان لك معالم وياعالم حد راح يحس بيك ولاتتوه الحقيقه

م إحنا لازم نضحي بيك علشان نفضل ونبقي وارد الفبريقه

أديني معاك صريح لازم اضحي بيك علشان تكتر ملايني

حرام عليك ياأبن الآيه نشفت من الدم شرايني

وأهه أديني ماشي جنب الحيط وبقول لها داريني


هناك 3 تعليقات:

سبهللة يقول...

يانحله لأنا عايز عسل منك ولاأقرصك ولا تقرصيني
ايه رأيك لو غيرتى البيت دة وخليتيه
يانحله لأنا عايز عسل منك ولا عايزك تقرصيني
دى اول زيارة لمدونتك
وبصراحة عجبتنى القصيدة هاقرا الباقى واعلق لك عليه ان شاء الله

وفاء بركات يقول...

السلام عليكم سبهلله
شكرا علي الزياره نورتيني ..ويشرفني انها تتكرر ..وشكرا جزيلاعلي رأيك اللي يهمني جدا وأنا في إنتظار تعليقاتك
تحياتي

وفاء بركات يقول...

السلام عليكم
الأخت سبهلله
جزاك الله عني خير عملت بما إقترحتيه عليه
وغيرت البيت فأعطاني جمله أجمل ووقع موسيقي أحلي...أنا في إنتظار زيارة أخرى قريبا إنشاء الله ..
شكرا وتحياتي