الأربعاء، 8 فبراير، 2012

ليه

ليه العنف بيتكلم بينا في كل مكان
بدل العلم بدل القلم سكين والآلم
ليه بنخون ليه بنشكك
ليه ما نتأكد ومن المعلومه نتحقق
ليه بنقتل فرحة قلوبنا
ليه لبعض الهم نشيل
ليه دمنا علي بعض هين
راح فين قلبنا الحنين
ليه بإدينا خنقنا روحنا
بعد ما كنا نداوى لبعض جروحنا
ليه صرخنا ما حد سمعنا
ليه مفهومنا للحريه
إنها فوضي وهمجيه
انا بسأل ليه لبعض دبحنا
ليه يحكمنا قانون الغاب
ليه نسن لبعض الناب
ليه نتفاخر بشرورنا
ليه منقاوم شرايرنا
ليه نحرق نفسنا بإدينا
ليه عميت قلوبنا وعينينا
حد يقول لي لأمتي ولفين جموحنا
ومين ح يشد كباحنا
حد يقولي آمني ساكت ليه
لما شاف دمنا بعينيه
مين قال حلم الشباب ينتهي
بطلقة رصاص ولاوإختناق
إمتي ح يكون بينا محبه ووفاق
إمتي ح يترد لحضننا التسامح
ويرجع ما بينا الود عهد وميثاق
إمتي الإختلاف في الفكر مايقابله رد جارح
ولا صريخ مبحوح ونكشف لبعض الأوراق
رد عليه ليه ولحد فين والصالح مين ليه ؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

عصاني نزف القلم
لاللحب مصابي جلل
سأتوقف عن الكلم
الآن انا في حزن وآلم
=============
حنتكلم عن الشهيد
ولا إستغلال الشريد
في قتل ثورى ولا عميد
ولا انه للفساد شر إيد
===========
أأأهه يا عداله يا سحلفه
فيه قلوب للحق متشحتفه
عايزه القصاص ومستحلفه
قولي لهم حاجه مفرحه
===========
في مدرج ملعب كان فيه ولد
أمه وأبوه فقدوه للأبد
كان حلمهم إن يكون بعد الله ليهم سند
القاتل معروف والصوره اكبر مستند

=================
عايزني أسميك إبن الميدان
وانت بتحرق وتخرب يا جبان
مالي ليه الحقد قلبك
ليه المال عمي عينك
ليه الشر ساكن جنبك
ليه الغدر ماسكه في إيدك
آى شيطان انت وأمتي
راح يصحي ضميرك
وقول لي دمار بلدك
في آيه ح يفيدك
إنت مش إبن الميدان
إنت عميل وجبان
بلطجي حركه أوفلول
ربي هو المستعان
وأنت ياللي الثورة أنت
إبعد بسرعه عن المكان
أرجوك أسمع الكلام
ينكشف ستر الدخيل ويبان

=============

هو اللي ناديت بيه إنحصر
في سقوط نظام ولاإعتصام
لأ يا مصر الحر فيك مقام
وإنتفض إلا عشان يرجع الغزل لينولك
وعشان زرعك يفرح عيونك
عشان رغيفك يبقي من أرض خيرك
عشان ولادك يرجعولك
===============
مالك يامصر ليه حزينه
مالك يامصر ما بتتكلميش
أيه فايدة إني أعيش
وأشوفهم عايشين فيك تهبيش
كانت عندى رغبة أكيده
إني أموت وتخرجي من سكوتك
وتعبرى حاجز حدودك
وتعليميهم إزاى تكون الثورة
نار من غير دم وأشلاء عديده
كنت عايزها ملحمة ولوحة فريده
مالك حزينه إتكلمي
فين أيام ما كنت بتتبسمي
انا قلقانه عليكي علشان معديش سعيده
تفتكرى إني مش حاسه بيكي
ومش عارفه اللي جرى فيكي
انت زعلانه عشان ولادك إتقسمو
ولبعض قتلو وشككو وخونو
عشان الأمورماعادت واضحه وصريحه
واللي بيعبر بيقول ألفاظ قبيحه
والصغير علي الكبير إطاول
والإحترام والآدب حاجه ماهي مريحه
والحوار بين الكبار ولا حوار بايعين سريحه
سكاكين ورا الظهور متخبيه
وديما فرضين لبعض سوء النيه
حبيبتي مصر الأبيه الفتيه
شدى حيلك ياصبيه
حتي ولو كان عمرك الف ميه
أنتي لسه بخيرك صبيه
أوعي يامصر تحسيني إني ضحيه
ناس عمرهم ماحبوكي وباعو القضيه






ليست هناك تعليقات: