الخميس، 21 أبريل، 2011

يالابينا نحلم

حكمة العدد :


حبيبك اللي تحبه ومتعشم قوي فيه


تقل عليه بالأسي يظهر لك جميع ما فيه


===========================

ليس كل مسلوق صحي


طبعا هذا رأى لايختلف عليه أثنين ولكن هناك أشياء تسلق فتكون النتيجة الشعور بلإكتئاب والميل للغثيان


مثل وحط تحتها مليون خط أغاني ثورة 25يناير أغلبية مطربينا كانو عايزين يركبو الموجة فكتاب الأغنية


كتبو كلام مش محسوس وزقوا فيه كلمة ثورة وشهيد وخبط ورزع وصوت متهدج وتشنيج في الأيدين وقسمات الوجه


والمضحك هذه المعلومة المفيدة جدا إن شهداء 25يناير ماتوا في أحداث يناير ده انا كنت فاكرة انهم ماتو في أحداث مارس


في أغينتين سمعتهم عجبوني إزاى للملك محمد منير واتبسمي لعلي الحجار أما الباقي مسلوق ديلع يأوم النفس ।


ياجماعة علشان نرتقي يجب أن نهتم بالكلمة وبالمادة الدرامية لأنها تعبر عن حال الشعوب ومدى إحترامهم لذاتهم



=======================================

روح أكتوبر .........وروح ثورة 25يناير................. وروح منك لله


بعد حرب أكتوبر الموظف يرفض الرشوة دى روح أكتوبر , الظابط يقبض علي عصابة ويحبط محاولات تهريب


روح أكتوبر , ألخ


ثورة 25يناير المسلبمين والمسيحيين إيد واحده دى روح الثورة , الثوار نضفو الميدان روح الثورة,الشعب تعاون مع


الجيش والشرطة دى روح الثورة أأأأأأأأأأأأأأأأأأأأأأأأأأأأأأأأألخ


وكأننا محتاجين مواقف لكي يظهر الحلو فينا وكأن الإخلاق الطيبة مستنية الأزمات علشان تظهر


الشهامة والمرؤة والإنتماء للوطن وحب الخير والغيرة علي بلادنا ورفض الفساد وكل ماهو سئ


المفروض دى من أخلاقنا متربين عليها وغير كده يبقي خروج عن القعدة لعدد قليل ويبقي منبوذ ...


أما في الشدائد بيكون العطاء بزيادة ,, يعني مثلا ساعة الزلزال التحمنا بكل حب مع بعض وكان


شئ جميل إن الناس ساعدت بعض عن قناعة بإن ده واجب علينا وايضا في البطولات الرياضية


الناس عبرت عن حبها لبلادها


بأسلوب جميل وفرحة وكنت دائما أتمني أن الفرح يكون في مجالات أكثر أهمية من الرياضة كالبحث


العلمي للنهوض ببلادنا صناعيا وزراعيا وتجاريا إقتصاديا تعليم صحة وعد بقي وانت ماشي البلد عايزة


عمره بفتح العين


الروح الحلوة والأخلاق الحميدة والمعاملة الطيبة المفروض دى سيماتنا يعني شئ عادى ليس بحاجة لطبل


وهليلة وضجة إعلامية ...


روح أكتوبر وروح ثورة 25يناير وروح منك لله لكل واحد حاول يموت الحلو فينا ويطمس ملامح المواطن المصرى॥


==================================================
اللي كل فتاة تبحث عن الزواج لاتتسرعي في الأرتباط مهما تأخر بك سن الزواج

ليس بالحب وحده تدوم الحياة الزوجية تقارب القلوب مطلوب لكن بدون التقارب الفكرى وعدم


ووجود لغة حوار يقصر من عمرالحياة الزوجية أو تستمر مملة رتيبة تجربة عشتها مع إنسانة قريبة لقلبي

لاعتاب

لاعاتبك ولا تعاتبني عتابك مش لازمني


لاقلبي في يوم كان عشك ولا انت كنت طيرى


ويستحيل أغشك روح جرب تحب غيرى


لاهواك وافق هوايا ولا حطول نجوم سمايا


من أول لحظة ملتأناش ولبعض مسمعناش


وقلوبنا متألفت علي الود ما حلفت


توهم نفسك بحبي ده ذنبك مش ذنبي


انا كنت صريحة معاك والحب ميتخباش


لاقلبي في يوم كان عشك ولا انت كنت طيرى


ويستحيل أغشك روح جرب تحب غيرى


لاكنت يوم شمع ليلي ولا نجمة في بحور سمايا


ولا دقة في نبض قلبي ولا كلمة في لحن غنايا


ولا كنت تملا عيني هاجرني ولا ناسيني


ما تفرق يوم معايا


طب ليه بقي تشتكيني ومشاعرى واضحة ليك


وتقول إنك أريني بأى لغة شفتني عينيك


انا مش فضيالك ومش ح أصبر كتير عليك


ولا أعاتبك ولا تعاتبني عتابك مش لازمني

=========================================

حكاية القط مشمش من أرشيف حياتي

هيثم أبني وهو صغير خرج يشترى طلبات للمنزل رجع وهو يحمل قط صغير

مكسور رجله أثر معاملته بغنف من بعض الأولاد في الشارع احضر له جبيره ومرهم

وأعتني به حتي طاب بعدها إستأذن مني ليبقي بالمنزل ولإننا إرطبتنا بالقط قلت لهيثم


علي شرط أن تعتني بنظافتة أحضر كرتونة بها رمل وكان يغير الرملة كل يومين


وكبر مشمش وكان يحب يقف في الشباك بحوارنا الي أن جاء يوم وخرج هيثم لذهاب عند


والدتي رحمة الله عليها وكانت في نفس شارعنا وقفز مشمش من الشباك خلف هيثم وكانت


أول مرة يخرج برة البيت وفي أثناء لعب هيثم وأصحابه مع مشمش لقينا حيوان يشبه الكلب


بيجرى وخلفه عدد من الأهالي يمسكون في أيديهم عصي وشوم ويصرخون أضربوه أضربوه


ولأن الحيوان ده كان بيجرى نحو هيثم إذا بالقط يقفز في وجهه مصارعا له في الوقت الذى جرى


فيه الأولاد يختبؤن في البيوت وخرجت أمي وهي تشد هيثم داخل البيت وهو يبكي من أجل مشمش


وقام الأهالي بضرب هذا الحيوان حتي الموت وعرفنا منهم انه سلعاوة وعض طفل من العزب القريبة

أثناء لعبه في الشارع ,وكان مشمش بيحتضر وسط بكاء الجميع وسبحان الله هيثم كان بيطبطب


عليه والناس كانت بتبعده ليعضه لكن القط لم يأذى هيثم وبعد أن لفظ أنفاسه الأخيرة فحت هيثم مكانا بجانب سور


। المدرسة المجاورة ليوارى به جثمان مشمش القط الوفي الجميل ॥

==============================================

حنية الذئاب
ليس هناك سبابا واحدا لإعلان الوصاية علي الشعوب العربية من قبل أمريكا وأوروبا


غير العمل علي مصلحة الكيان الصهيوني وتنفيذ حلم دولة صهيون من النيل للفرات


وأيضا الإستيلاء علي خيرات الوطن العربي الملاحظ إن قوات الناتو تغير علي الثوار بنيران صديقة


وأمريكا قلبها وكيلها علي الشعب الليبي وبتدافع عن حريتة وبتدعم المعارضة الليبية من أمتي الحنان ده


أنتو فكرين حدوتة ذات الرداء الأحمر لما الذئب نام مكان جدة ذات الرداء الأحمر وكانت بتسأل مال عينك


حمرة ليه يجدتي تقول من العيه يابنتي مال إيدك خشنة ليه يقول الذئب من العيه يابنتي مال سنانك كبيره ليه


يهجم عليها الذئب علشان أكلك يابنتي ومدمنا عارفين إن الذئب منتهز فرصة للإنقضاض نعمل بقي حسابنا


ونفوت عليه الفرصة الفكر الإستعمارى بيجيد سياسة النفس الطويل وبيتكتك صح بيضربنا في حته


ويلهينا بآلامها وهو عينه علي حته تانيه ومتنسوش إن سياسة فرق تسد مازالت تجدى بثمارها علي


أمريكا وإسرائيل ولا نسينا العراق أفغانستان وحتي فلسطين والفتنة أشد من القتل ...


نفسي نفوق ونركن أطماعنا الشخصية جانبا ونعمل من أجل نصرة الوطن ।


هل إنتبهتم لرد فهل إسرائيل للمصالحة الفلسطنية ونغمة التهديد الإسرائيلية لزعماء فتح وحماس


الله يرحمك ياشيخ مروان كان يجب عليك كسر العصا علي أولادك وتوسعهم ضربا حتي يتحسسوا


مكان الألم كلما تفرقوا فيعودوا لرشدهم ॥

=================================
مناجاة

يامن له الدعاء لا تجعل ذلي ومسألتي إلا لك

يامن يتوق قلبي لحج بيتك


وأتمني أن تلمس يدى كعبتك

يامن ستدخلنا الجنة برحمتك

إقبلني آمة تائبة طائعة ترجو محبتك

جيرني من ظلم غائر

جيرني من شرعبد فاجر

جيرني من طمع هادر

جيرني من غضب ثائر

جيرني من ذو سطوة قادر

علي حق الغير جائر

جيرني من ضعف نفسي

لاتتركني ربي كثيرا حائر

====================================

يارب عدى بمصر الي برالأمان

تحيا مصر































هناك 7 تعليقات:

nour shahen يقول...

تحيا جمهوريه مصر العربيه
تعيش مصر حره مستقله
اقولك ايه راح سعد مش هينفع اقول سعد سعد يحيا سعد
هعيط يا بنت الحلال اعلق علي ايه ولا علي ايه
اولا شدنى البوست بأبتسامه من الكتابه الساخره بتاعتك والله ليكى حق ودمك زى السكر فيها علي فكره
ثانيا بتناقشى بجمال وهدوء احوال كتيره تقريبا كلها مرتبطه ببعض
امريكا فعلا بتتمنى اى شعب يستنجد بيها سواء طلب ولا مطليش هى بتتدخل وربنا الحافظ هو سترها معانا والله
عجبتنى جدا قصة مشمش وفاء الحيوان بيذهل وكأن قمة ذهولنا ان حيوان يعمل كدا وبنى الانسان معطمهم يعملو عكس كدا
اما بصراحه توقفت شوية عند الخواطر بتاعتك يا فوفا الفكره جميله بس بيسقط منك احيانا النغمه فيها بس بترجعى تلحقيها
عارفه لو ركزتى اكتر وقعدتى تفكرى فى جمله تفيد نفس المعنى هتلاقى فكرتك ماشيه مع النغمه اللي تحبيها وتشجى
حسيت انك اجادتى المنجاه لله اكتر من الخواطر اللى سبقتها
انا عارفه انى كلامى تقيل فى النقد بس وربى لأن الفكره فى كلماتك عجبتنى كتير وشايفه ان بتدقيق بسيط هتكون اروع مما هى عليه الان مكنتش قولتلك حاجه
لأنها دلوقتى فى حد ذاتها كدا هايله بس بتمنالك دايما الاحسن
وعلي فكره برغم شكل البوست كدا نحسه طويل بس عمر اللي هيقراه ما يمل
انتى عامله زى اللي عامله لينا وجبه من كل شىء , حسيت انى بقرا جريده او مجله ولأول مره متبقاش تقيله علي قلبى علشان لقيت فيها كل اللي احبه وبس لا اخبار زياده ولا كلام يصعب فهمه
ربنا يبارك فيكى يا فوفا ودايما تقدمى الاحسن والاجمل وطريقة كتابتك احسدك عليها نفسى فى يوم اتعلم اكتب بسلاسه كدا يلا ادينى بتعلم منك وفى يوم هغش اكيد واكتب زيك هههههههه

norahaty يقول...

السلام عليكم ورحمة
الله تعالى وبركاته
ربنا لا يحرمنا
من ذكرياتك
ولا كلماتك
الحمد لله
ان ربنا سلم
على ابنك من الشر
دا ربنا ينجى المؤمنين أجمعين.
اما الأغانى فالحمد لله لم أسمعها
لا من الكنج كما يسمونه
ولا من الصعلوك.مبقاش
فيه حد يملا الدماغ:)
ومش حانسى آأمن
على كل دعوتك
الطيبة ياست
ياطيبة اوى
يامدام وفاء

norahaty يقول...
أزال أحد مشرفي المدونة هذا التعليق.
وفاء بركات يقول...

الأبنه نور شاهين
ده انا دمي كله سكر وبزياده كمان هو الدكتور بيشد شعره مني من شوية حيسيب الطب وينفخ بلالين
قولي كل اللي في نفسك حرمتك من حاجة أبدا ياختي علشان توفرى فلوس الجرايد
شويه وعملكم كلمات متقاطعة
وشكرا حبيبي علي هذا النقد البناء المؤدب علي فكرة هذه الملحوظة وجهت لي من أستاذنا الرائع الشاعر بيرم المصرى صاحب مدونة كرباج سوداني انا عندى خمسة عشر جزاءا من اغاني الأصفهاني
تايهين مني ولو حبة الكسل اللي عندى دول مشيوا بعيد شوية ابحث عند عم جوجل واطلب منه المساعدة ربنا المستعان
يمكن تضرب معايا وأعمل ديوان يكسر الدنيا..

كتباتي كلها بتكون قبل الفجر أوبعده ولو الفكره جات بسرعة علي الورق والقلم قبل منسي
ولازم أكون حاسة الكلام قوى .
كان نفسي أكون محامية أوصحفية بعد المعاش أشتغلت في جريدة محلية لمدة عشر شهور وكنت بعمل تحقيقات في المشاكل الإجتماعية أسبابها وطرق حلها بمعرفة أساتذه من علم الإجتماع والنفس بالجامعة عندنا وسؤال أهل الدين لكني لم أستمر لأسباب شخصية
وبعدين أخجلتم تواضعنا ياست البنات
تتعلمي منا ايه وانت صاحب مدرسة لوجدك ياقمر
يارب دايما منوراني

وفاء بركات يقول...

نور حياتي حبيبة قلبي
اللهم امين علي دعواتك الجميلة دى
يارب يخليك لي ويحفظك من كل شر
وعملت خير لعدم سماعك الأغاني بس بتكون مفروضة علينا لأنها بتكون وسط البرامج
بوطي الصوت خالص علشان مسمعهاش لأنها بتنرفزني
طول عمرك رقيقة وصاحبة واجب هو بحبك من قليل دمت لي

Beram ElMasry يقول...

الاهت الكريمة والشاعرة وفاء بركات
حرمت مدونتي من عليقاتك الرقيقة وعبارتك الرشيقة فارجو ان يكون المانع خير
وان تكوني وجميع الاهل والحفيد بصحة وسلامة
تحية وسلام ولاسلام مع بني اسرائيل

Beram ElMasry يقول...

الاخت الكريمة الشاعرة وفاء بركات
اظلمت مدونتي لانقطاعك عنها فلا تحرمينا طرافة التعليق والابداع الشاعري والاسلوب الرقيق
تحية وسلام ولاسلام مع بني اسرائيل