الثلاثاء، 20 أبريل، 2010

جعان كل لما تشبع بس مكسر متكلش سليم متكسرش

جعان كل لما تشبع بس مكسر متكلش سليم متكسرش




ده مثل سمعته زمان من جدتي رحمة الله عليها إفتكرته لما بعض من أعضاء مجلس الشعب نوبنا العظماء من أصحاب الكروش




الواسعة والضمائر المطاطة طالب بإطلاق النار علي الشباب المتظاهرين والذين يعبرون عن رأيهم في حال البلاد॥




ويمكن طبعي يرفض التظاهرات ولكني أحب أن أعبر عن رآى بالقول أو بالكتابه وطبعا اللي حيسمعني عدد محدود ويمكن





ميكنوش صوتي له صدى علشان كده اللي انا عاوزاه بيبقي جواية وأحيانا بيقولوا علي اللي مثلي سلبيين أو مسالمين




لكن رأى إن أحيانا في ناس تندس وسط المتظاهريين وبيقوموا بتصرفات سيئة تنسب لهؤلاء المتظاهريين وهم مجموعة




من الشباب المثقف الواعي ويعلم جيدا إن إتلاف المال العام ليس في صالحة والنهب والسرقة التي يقوم بها هؤلاء الخارجيين




عن القانون المندسيين سوف تنسب لهذا الشباب الحر حرج شديد وإلصاق هذه التجاوزات الغير مسئوله لهم ودى طبعا
وجهة نظرى ॥




نجي بقي لموضوع المثل لو الساده الأفاضل من الحزب الوطني يبقي عيب عليهم قوى يطالبو ا برمي هؤلاء الشباب




المتظاهر بالرصاص لأن الحزب ملقب بالوطني الديمقراطي طب ولو نائب في المعارضه تبقي مصيبه لأن سيادة النائب المعارض




بيصرخ في بالرلمان ليل ونهار من أجل مزيد من الديمقراطيه ...



طب الشعب في زمن الديمقراطيه والمطلوب منه أن يعبر عن رآيه يعمل آيه طبعا حيروح في حته الناس تشوفه وتسمع له




ويقول بقي اللي في نفسه ويدمقرط برحاته مهو النواب الأفاضل بين منادى بالديمقراطيه وبين ديمقراطي أبن ديمقراطي




بس لقي حد بيقول له ديمقراطيه آه بس بحقك مطالبش وان طالبت متتكلمش وإلا سوف نقوم نحن بخرسك إلي الأبد طب ده أسمه




كلام علموا شبابنا ثقافة الحرية أزاى يعبروا عن رآيهم بتحضر إزاى يلاقوا ودن تسمع لهم وأيد تتمد لهم أسمعهوا لأفكارهم



وخلوهم يشاركوا في تقديم الحلول خلوهم يختاروا الحزب اللي عايزين ينضموا ليه ويكون ليهم أجنده يقدموها وياتزموا




بيها ॥




إبدؤا بالديمقراطيه وحرية التعبير بتحضر ورقي من المدرسه ولو فيه خلل في أى مؤسسة ينظر لموطن الداء ونقدم




الدواء ويبتر مسبب الداء ... تسحب بعض الصلحيات التي أفسدت بعض من هؤلاء النواب كتأشيرات الوظائف والحج




والعلاج علي نفقة الدوله لكي لا يكون دخول المجلس سبوبة تستحق الصراع عليها ....




وعاوزه أقول حاجه أوزنوا النواب قبل دخولهم المجلس وبعد خروجهم والفرق ده حقنا دمنا اللي عايزين يهدروه



صحيح اللي أختشوا ماتو ।



وجعان كل لما تشبع بس سليم متكسرش ومكسر متكلش وبالهنا ءوالشفاءوعجبي




هناك 10 تعليقات:

فشكووول يقول...

السلام عليكم يا ست هانم
تحياتى
انا عملت بوست عن الموضوع ده وعن النواب المحروسين اللى عايزين يرمونا بالرصاص .. بس اللى حيجننى هو رجب هلال حميده اللى من حزب الغد بس حزب الغد فرع الحزب الوطنى هو كمان دخل على الهوجه وطالب بتعامل الداخليه بعنف مع المتظاهرين
اما يتظاهروا فين زى ما بيقولوا فى استاد القاهره .. يعنى فى حته ما حدش يعرف لهم طريق ولا حد ياخد باله منهم ويبقوا كدا استريحوا من وجع الدماغ وخليهم يخبطوا دماغهم فى الحيط
وبعدين يا ستنا هما المتظاهرين من امتى كسروا ولا حرقوا ولا عملوا اى حاجه وحشه .. دى فزاعه كل ما حد يتكلم يقولوا القله المندسه .. ولا فيه مندسه ولا فيه حد بيعمل حاجه
وتلاقى بتوع الحزب الوجنى عنيهم تندب فيها رصاص وعمالين يدافعوا ويقولوا واخوك نبيل لوقا بباوى قاعد يزعق فينا وكأن ما فيش حد بيفهم فى الدنيا غيره وهو راجل اصل لواء يعنى تربيه امنيه وعقل امنى وفكر امنى .. هما دول النواب بتوعنا اللى حطينا الامانه فى اعناقهم ويا ريت ما حطناها ولا اديناها لهم .. هو احنا اصلا ما اخترناهمش .. هما اللى اختاروا لنا وبيعملوا لنا كل حاجه واحنا بس ناكل على الجاهز
كل ما حد من الحزن الوطنى يتكلم يقول طب لو الانتخابات المزوره طب ازاى جه 88 واحد من المحظوره .. صحيح لان فى المرحله الاولى كانت الانتخابات فعلا نزيهه الى حد كبير ولما لقوا الموضوع حيفلت من ايديهم اتدخلوا فى المرحله التانيه ووقفوا وقفة رجاله فى المرحله التالته وما خلوش اى حد يفوت ولا يروح ناحية المحظوره وكانت غلطه ومش حتتكرر تانى
واوعدك ان الانتخابات الجايه سواء الشورى او الشعب ان كل نواب الوطنى حينجحوا بالزوق او بالعافيه ويراعى التجديد لدورات قادمة عشان دا مجلس الشعب اللى حييجى عن طريق الرئيس الجديد اللى هو برضه القديم واللى مش قادر يقف على رجله ولا عنده دماغ للوطن ولا الشعب وسايب البلد يحكموها ناس تانيه غيره
بلد منحوسه صحيح

واحد من العمال يقول...

السلام عليكم

المثل جميل جداً
وبالنسبه لتصريحات نواب الحزب الوطنى بضرب الشباب المتظاهرين بالنار
ده بيفكرنا بأيام الأحتلال البريطانى عندما كان يفتح النار على المتظاهرين المطالبين بالحريه والأستقلال لمصر
والقله المندسه دى من أختراع جنرالات الأمن وليس لهذه القله وجود الأن
كل الحكايه أن هؤلاء الشباب بنزولهم الشارع بعد أن ملوا من الكفاح على الأنتر نت والفيس بوك
وصرخوا بأن الشارع لنا
جن جنون الكروش الكبيره المستفيده من بقاء الوضع الحالى والمظاهرات تطالب بتغيير ليس الرئيس ولا الحكومه فقط بل بتغيير السيستم كله وخرجت تلك المطالبات الشاذه بضرب المتظاهرين بالنار من نواب الشعب
ورغم العوده والأنكار وقولهم أن كلامهم تم تحريفه إلا أنهم دخلوا التاريخ كنواب للشعب أتى بهم الشعب للدفاع عنهم فردوا للشعب الجميل بالمطالبه بضربه بالنار إذا تذمر أو مل أو طق
بس عموماً مصر بدأت تصحى من النوم ولو صحيت مش حتنام بالساهل
بس الموضوع عايز وقت
وجعان كل لما تشبع بس مكسر متكلش سليم متكسرش

ومع خالص تحياتى
ودمتِ بخير حال

Sharm يقول...

ربنا ياخدهم

وفاء بركات يقول...

أ.فشكووول
مراحب مراحب
والله ياأستاذنا انا مثلك تماما رجب حميده محيرني رد فعله مش وخدين عليه ده كان بيقف في المجلس بهلهلهم الواحد محتار مين مع مين ومين باكي علي مصلحة مصر
واللي أعرفه إن الناخبين يستهلو لأنهم صوتوا لناس لاتستحق أن تمثلهم في مجلس الشعب المفروض الصوت الحر لايباع ولا يشترى لكن الي حصل غير كده خالص اللي باع صوته بكرتونة تموين وكيلو لحمة ولاحتة قماش ولا مائة جنيه مقسومة نصين
نص معاه والأخر مع الاضيش السيد النائب
وبعد متظهر النتيجه ويطمن سعادتة علي الكرسي أدى وش الضيف
واللي إتاكل أعزكم الله نزل في المجارى والقماش داب والمائة جنيه إتصرفت..
وكل مرة يتكرر الموضوع ده والناس غلابة بتنسي ..
ولا تقولي حزب حاكم ولا معارضه كلهم زى بعض .
إحنا بنصوت لهم وهمه بيصوتوا علينا.
تحياتي

وفاء بركات يقول...

أهلا بواحد من العمال المحترمين جدا
الموقف صعب وصورتنا بقت زى الزفت
والبلد مش متحمله اللي بيحصل ده محتاجين نتعلم إزاى نكون متحضرين الشعب يطرح أفكاره ومشاكله في قنوات شرعية والحكومة تسمع وتقوم علي دراسة هذه المطالب والعمل علي تلبيتها وفقا لجدول زمني تلتزم بيه وكمان تطلب من الشعب أن يساعدها علي المرور من هذه الأزمة زى محصل في سداد ديون مصر وعلي المستوى المحلي عندنا ساهمنا في بناء الجامعة والكوبرى الذى يصل بين ضفتي النيل بكل رضا لأننا عارفين ان ده سيعود بالنفع لينا والأجيال القادمه
مش معقول ثمانين مليون وأكتر يكون قوتهم
ومستقبلهم في قبضة قلة من مصاصي دمهم وجهدهم..
صدقني انا حزنانة جدا ومستائه لأن رجال الشرطة المفروض أنهم مصريين والمتظاهريين مصريين وسوى ده ضرب ده ولاده إعتدى علي ده صورة محبش أشوفها
والساده النواب الأفاضل يرجعوا للتاريخ ويتعلمو من من رجال السياسه القدام اللي كانو بيصرفوا علي الحزب وكان ليهم قضية واحده النهوض بالوطن مش الهبوط بالوطن الي منحدر مايعلم بيه إلا ربنا
ربنا يستر انا خايفه من اللي جي

لك مني كل تحية ودعوات بالتوفيق والصحه الدائمه

وفاء بركات يقول...

شارم
مرحبا بك .. نورتني وشرفتني ..
وربنا ياخدهم..
علي فكره ده مش حل علشان حيجي اللي ألعن منهم وده لأننا نسينا ربنا وإنتمائنالبلدنا لايظهر إلا لماتش كوره
وسايبين غيرنا ينتج ويصنع وإحنا نستهلك
وسايبين غيرنا يفكر لنا وإحنا ننفذ
انا خايفة يجيبو مية شرب صيني ولا إحنا بعد كده نتكلم صيني عملنا فيلم عن التجربة الدينماركية ولم نعمل فيلم عن التجربة الصينية..
المنتج الصيني ردئ وبالرغم من كده بنشتريه علشان رخيص الصين قضت علي صناعات خفيفة كانت فتحه بيوت ناس كتير زى صناعة الورود الفوانيس
ياإبني حته السبح وسجاجيد الصلي
اللي بيروح الحج بيجيب هدايا الاقي ميد إن إتشاينا الرموت صيني ..
دلوقت بيخبطو علي البيوت وبيعرضوا خدماتهم علي أصحابه( نكوم بتزين الرجل والمدام والسأر زهيد خمسة جنيهات )وطبعا العدة في الشنطة والحال ماشى
وحيجيبو ضلف الكوافيرات والحلاقين.
وعلي النت عروسه صيني ليس لها طلبات لامهر ولا شبكة ومستعده للسكن في بيت العائله وستقوم بجميع شغل البيت وهي قليلة الطلبات وقليلة الأكل قال يعني البنات عندنا نقاصيين وقف حال
حقولك علي حاجه ربنا ياخدهم ويتولانا برحمته
وأخيرا أتمني لك حياة مستقرة سعيده وان تداوم علي زيارة مدونتي

MaNoO يقول...

انا بس جيت اسلم عليكى واطمنى سورى مكنتش بدخل الفتره اللى فاتت بس ان شاء الله نتواصل بالمودنات تانى يارب تكونى بخير

وفاء بركات يقول...

حمد الله علي السلامة يامانو
بجد نورتني ...ونورت بلوجر كله
ويارب ماتغيب أبدا وحسك يفضل في الدنيا
وفي إنتظارك .. تحياتي

كلمات من نور يقول...

لله الأمر من قبل ومن بعد يا وفاء

حقيقي مش قادرة اعلق تعبت من السواد اللي بيحيط بينا بس عشمي في الله كبير ...تحياتي

كلمات من نور يقول...

لله الأمر من قبل ومن بعد يا وفاء