الثلاثاء، 14 أبريل، 2009

طبعا انا في موقف لاأحسد عليه لأن ليس لي في موضوع التاجات ده فرحت مدونة من غير عنوان
وشفت هو عمل آيه وأديني أ هو حأبتدى أجاوب ॥أول مره جاني تاج من مدونة الصباغ وكنت أول شهر تدوين
معرفتش أعمل أيه فمجوبتش عليه المره دى بقه إتصرفت ربنا معايا
1-اسمك
الأمه الفقيره الي الله وفاء
2-المشهور به بين اصحابك:
بين الأصحاب الكبار والأقارب رضا -- وأحفاد أختي تيتا شيبسي ---- وبين أصحابي من الشباب أبله فوفا أو ماما فوفا
3- سنك ؟
في عين عدوكم ماشيه في الخمسه والخمسين
4-مجال دراستك
دبلوم تجاره
5-اسم مدونتك
وفاء بركات
6-الصورة الرمزية فى المدونة بتعبر عن ايه؟
حفيدى أحمد أول حفيد ربنا يخليه بيعبر عن إمتدادى في الحياه
7-هل فكرت فى اغلاق المدونة والسبب؟
لا التجربه أعجبتني وكفايه أن التدوين عرفني عليكم وبجد إستفد منكم كتير
8-إيه رد فعلك لو حد قل أدبه فى تعليق ؟
حصلت مره واحده وزعلت جدا لأن الكلام كان جارح لدرجة اني بكيت وطبعا مسحت التعليق
9-اسوأ مدونه؟؟
اللي بتسخدم الفاظ بذيئه في التعبير عن رأيها تحت شعار كل واحد حر في رأيه
10-هيحصل إيه للايميل بعد ما تموت
سيعامل معاملة الميراث أهو الواحد يسيب حاجه للعيال وأبوهم
11-اديت الباسوورد لحد قبل كده؟
للأستاذ أحمد الصباغ وهبة الله ومحمد ولادى
12- السفر بالنسبة لك ايه؟
احبه جدا بس لو معايا ولادى وطبعا أحمد قبلهم منغيرهم لا اشعر بمتعة السفر
13-الموووود بتاعك ايه ؟
متقلب محبش حد يجرحني لأني بتعامل مع الناس بكل إحترام وود
بيضاقيني من البعض إستغلال كرم أخلاقي في تجاهل مشاعرى
بحب المرح واللمه وخصوصا لو لمة العيله هاديه قوى ونرفز قوى
لإن بصبر كتير علي القاسيه لكن للصبر حدود
14-بتعمل ايه فى وقت فراغك؟
بجرى علي المدونه أزور أصحابي المدونين أو أكتب حاجه في مدونتي
15-الأكلة المفضلة ؟
كل محلله الله وعلي رأسهم المحاشي واللحمه والسمك بحبه كله بفضل البياض
16-الصفات التى أخذتها من والدك؟
الصبر علي القاسيه والتسامح
17-الصفات التى أخذتها من والدتك9-
تقديم المساعده للغير حتي لو ميستهلش كله لوجه الله
18اكتر ست حاجات بتكرههم ؟
التلاعب بمشاعر الناس - إستعمال كلام له أكثر من معني دون توضيح القصد -الخيانه والغدر- عدم إحترام حرمة البيوت
الكذب - أكره وبشده من ينتمون للإسلام مظهرا وأداء مناسك ولكن أفعالهم لاتمت للإسلام بصله وحجات كتيرتانيه
19-اكتر ست حاجات بتحبهم ؟؟
كل ماهو طفل - بحب الحب كمشاعر نبيله صادقه- بحب التسامح - بحب أقعد قدام النيل قوى
بحب أسمع أذان الفجر وخصوصا لما المؤذن يقول الصلاة خير من النوم- بحب اللي يحب ولادى
20-شخصيتك نوعها ايه؟؟
شخصيه إجتماعيه إنطوائيه أنا بحب أكون مع الناس بس مبعرفش أبدأ بالحديث فلو موجهوش
ليه كلام خصوصا لو معرفه لأول مره بيصعب عليه الإندماج معاهم أحب البساطه
21-لماذا دخلت عالم التدوين من الاساس؟
شاهدت في برنامج البيت بيتك فقره فيها الفنان خالد الصاوى مع أخرين
وكانو بيتكلمو عن التدوين شجعتني إبنتي هبه الله علي عمل مدونه خصوصا
وإن كان لي بعض الخواطر الشعريه من أيام الدراسه وكان أول تعليق للصباغ
الذى ساعدني في تصميم المدونه جزاه الله عني خير
22-احلي جملة قيلت فى وصف مدونتك ؟
أصدقاء مدونتي مقارنتا بالمدونات الأخرى يعد قليل
فمقدرش أقول كتير ولكن صاحب مدونة النسر المصرى
أعجب بطريقة كتابني وشجعني علي أن تكون لمدونتي هدف
23-احلى بوست كتبته؟ ضع اللينك ثم اذكر لماذا؟
كلهم أولادى وعزاز عليه وعدى ياليله
24-افضل مدونة قرأتها؟
المدونه اللي بستفاد منها دنيا ودين
25- افضل بوست قرأته؟
البوست اللي بيعبر عن حالنا وبيمس مشاكلنا
26-الشغل بالنسبة لك ايه؟
كان بالنسبه ليه تنشيط للذاكره وبعدين بقي حرق دم فسبته وقعدت في البيت
27-النت بالنسبة لك ايه؟
عالمي الذى أسبح فيه بجد فيه الإجابه عن كل أسئلتي
وأحلي حاجه اني إتعرفت عليكم
28-تمرر التاج لمين
بنتي نونا أجمل إحساس
د।وائل عقابا ليه علشان مبيزرش مدونتي
مدونة واحد من العمال
وكفايه كده
وشكرا للدكتوره نور هاتي علي التاج ويارب أكون وفقت
في الإجابه

هناك 35 تعليقًا:

NoNa يقول...

ههههههههههههههههههههه

دى هديه جميله اووى يا استاذه وفاء

احلى حاجه فيها بجد انك اختارتينى اول اسم مرسى ليكى جداا جدااا

ان شاء الله هابقى اعمل تاج

ياترى انتى اخبارك ايه يارب تكونى بخير يارب

Wael يقول...

اجابات كلها جميلة جدا :)

واشكرك طبعا على الاهتمام
لكنى معلش " بباصى " التاج لاى حد تانى تختاريه , لانى مليش ف التيجان بصراحة بتجيلى حساسية

واوعدك انى اتابع مادام العقاب هايكون بالشكل ده :)

وشكرا مرة تانية

وتمنياتى للاسرة بدوام السعادة

norahaty يقول...

السلام عليكم ورحمة
الله تعالى وبركاته
بسم الله ماشاء الله
دا انتى وفقتى ونص وتلات اربع كمان ياأستاذة اجاباتك ممتازة وإن تدل فتدل عليكى ياطيبة ياأميرة الاميرات
وانا مبسوطة جدا جدا لانى كان لى شرف التعرف علي مدونتك لانك زى ما بتقولى ما بتزريش حد كتير فالحمدلله انى عرفتك
اما تدبيسك للدكتور وائل :):):)
فانا فرررررررررررررررررررررحانة
بصراحة ايوة فرحانة فيه وبرافو عليكى عملتى اللى خفت انا من عمله:)
سلامى وتحياتى وتمنياتى لك بالصحة والعافية وراحة البال يارب

gana magde يقول...

احجززززززززززززز وراجعه

gana magde يقول...

ايه يافوفا الرومانسيه دى نيل وهدوء وحب وتيتا شيبسى
وللصبر حدود

جامدة الاجابات دى

تحياتى

فشكووول يقول...

العزيزه وفاء هانم برجات
تحياتى
احييك على الاجابات السهله فى التاج واحييك على صدق مشاعرك واحترامك للآخرين
وتحياتى الى اولادك وحفيدك الغالى احمد
ولحضرتك طبعا

واحد من العمال يقول...

السلام عليكم ورحمه الله وبركاته

الغاليه جداً جداً / وفاء هانم بركات

أشكرك على الهديه
وإنشاء الله حجاوب بس على مهلى لأنى مشغول شويه فى التدريب على إداره منتدى لكفر الزيات بأحيائها وقراها كلها
تتصورى حضرتك إداره المدونه أسهل كتير
وسيكون هناك منتدى لمدونين بنحبهم
ولروابط مدوناتهم

ودمتِ فى أمان الله وحفظه

محمد الجرايحى يقول...

سيدتى الفاضلة: وفاء بركات
السلام عليكم ورحمة الله وبركاته
شرفت بزيارة مدونتك الطيبة والتعرف على شخصيتك الكريمة من خلال هذا التاج
بارك الله فيك وأعزك
وتقبلى مرورى وتقديرى واحترامى
أخوك
محمد

DoNyA يقول...

استاذتي الجليله وفاء بركات

استمتعت كثيرا باجاباتك
التي ادخلتنا اكثر في عالمك
اطال الله عمرك
ومتك بالصحه والسعاده
بين اولادك واحفادك
اللهم امين

الفقيرة إلى الله أم البنات يقول...

اختى الجميله قوى ولا ازكيك على الله
ماشاء الله ردودك جميله ..وتنم عن قلب طيب احسبك على خير ولا ازكيك على الله

بجد استمتعت وانا بقرا بحب البساطه والتلقائيه..لانها بتعبر عن الانسان

ربنا يفرح قلبك بأولادك
وبينى وبينك بلاشغل بلا وجع قلب البيت(الاسرة كلها)
والقرآن(المسجد ودروس العلم) والنت (التدوين..والاستفاده من المواقع الطيبه)وكفايه
ربنا يبارك فى عمرك وعمر اسرتك ويسعدكم فى الدارين

فشكووول يقول...

ازاى يا وفاء هانم انا ماجيتش
انا جيت وعلقت وربنا يخليى لك احمد وهبة الله ومحمد وانا متابع جيد لمدونة حضرتك وربنا يديك الصحه ويبارك لك فى اولادك وخصوصا احمد وكل اللى اسمه احمد عشان انا كمان اسمى احمد
تحياتى

مدونة النسر المصرى يقول...

المتميزة المبدعة /وفاء بركات
بصراحة انا مكسوف نمك جداً علشان مش بعدى حتى واسلم عليكى
بس انتى عارفه المشاغل وايلى متجوز اتنين يكون ايه حالته هههههه
طبعاً بهزر بس هى مشاغل الدنيا ارجوا تقبل عذرى واشكرك على التواصل بعد طول غياب
ياسر حسن

من غير عنـــوان يقول...

ما شاء الله
أم مصريه صميمه
وسيده طيبه عظيمه الفكر والهدف

تحياتي

وفاء بركات يقول...

نونا انتي الأجمل ياحبي
يارب عقبال تاج فرحك وشوفو كده علي رأسك وانتي زيناه.
انا الحمد الله بخير

وفاء بركات يقول...

اهلا بالدكتور وائل كان لازم أوريك العين
الحمرا علشان تعبرني .. انا حاسه
إنك حتزورني تحت تهديد التاج ..
حلوه البلفه دخلت الأول بإجابات جميله وبعدين حساسية التاج إزاى يادكتور مش قادر تعالج نفسك من دى الحساسيه وأباصي علشان عارف إني بشجع كوره
يعني انت مش عارف اني عندي خشونه في الركب وصعب إني أباصي ..
الدكتوره نورهاتي فرحانه فيك يعني قصدى يعني حاول تتحدها وتتحدى الحساسيه
وتجاوب علي التاج أحسن من القعده فوق السطوح وأكل طعميه ومسقعه معموله بزيت العربيات حد يتعشي ديناميت طب ده حل التاج أسهل .
الأسره كلها بتسلم عليك وطلبه تسمع
علي عيني كلامك ياناسي ده انت سيدى وتاج راسي..وبتهديها لكل المتهربين من حل أسئلة التاج
ودمتم بخير وصحه.

وفاء بركات يقول...

وعليكم جزيل السلامات والرحمات من الله
التعالي ويحل بركاته عليكم .
أشكرك دى شهاده أعتز بيها..وكل كلمه طيبه منك لأنك إنسانه طيبه ..
والشرف لي بمعرفتك التي اضافت لي الكثير
العلم والعرفه.
آيه حكاية خفتي دى هو عامل إرهاب ولا أيه.. ده عاوز يفلفص من الإجابه بس أبداعلشان يحرم ياكل من ورايا مره يعمل بوست أكلات الشعوب ومحشي وحاجات تفتح النفس ومره طعميه ومسقعه وقال آيه عنده حساسيه من التاج إكتبي له روشته للحساسيه علشان تبطل حجته.
ربنا يديم عليك نعمة محبة الناس ليكي
اللي هيه من محبة الرب وينولك كل ما تتمني

وفاء بركات يقول...

أهلا جنه
نورتيني بجد وحشاني نفسي أشوفك قريب
هو كده أبقي رومانسيه نمشيها ياقمر
بس رومانسيه كبيره شويه قصدى شويتين
اتمني لك النجاح في الدبلومه إن شاء الله
وفي كل حياتك

وفاء بركات يقول...

أ. فشكوووووووووووووول
تحيات وإحترمات أفنذم شرفتم حذراتنا
وجميع أسرتنا تسلم عليكم وعلي عائلتكم الكريمه.

وفاء بركات يقول...

واحد من العمال
براحة حضرتك وربنا يوفقك وزملائك
فكره جديده ومفيده بحيك عليها.
ونحن في الإنتظار ..
متعكم الله بالصحه والعافيه

وفاء بركات يقول...

الأخ محمد الجرايحي
شرفت ونورت وكانت مفاجئه ساره لي
لأني أقراء تعليقاتكم عند أ. فشكول
وأنا سعيده لرأيكم فيه وعلي تلك الدعوات الصالحات ولك مثلها ويجزيك الله عني خيرا
مرور عزيز علي وأرجو التواصل

وفاء بركات يقول...

دنيا يامرحب يامرحب
ربنا يحلي دنيتك علي الكلام الجميل ده
يارب دايما أكون عند حسن ظنكم بي
وأشكرك علي كل كلمه طيبه لي حلي الله لسانك وعلي مقامك .
دمت لي

وفاء بركات يقول...

أهلا بالأخت الفقيره ألي الله
الغنيه بإيمانها به ..كيف حالك
وحال ملاكك الصغير ربنا يحرسها ويشفيها
ويبارك لك في أختها ..
زيارتك شرف لي ودعواتك أمنت عليها
ويارب دايما أكون عند حسن الظن بي
ربنا يسعدك ويفرح قلبك ببناتك
ويزيدك إيمان .

وفاء بركات يقول...

أ. فشكووووووووول
يافندم حضرتك جيت وعلقت علي التاج فين التعليق علي اللي اقبل التاج
ربنا يخلي حضرتك منور الدنيا ..
حضرتك عارف إن البوست بيبقي وحش من غير تعليقك عليه.
سلامي للحاجه والأولاد والأحفاد حفظهم الله ورعاهم

وفاء بركات يقول...

مدونة النسر المصرى
الأستاذ ياسر حسن
مفيش بين الإخوات أسف وأنا عارفه مشاغل من يعملون في بلاط صاحبة الجلاله
أكثر من المتزوج بأربعه ربنا يكون في العون.
أنا بزور مدونتكم بين الحين والأخر وتركت تعليقات علي بعض المواضيع
أشكر حضرتك علي الزيارة
ودمتم

وفاء بركات يقول...

باشمهندس محمد
ربنا يخليك ويحفظك من كل شر
ويفرحك بحبابك ..
ربنا يكرمك علي الكلام الحلو ده
ويسعدك كما أسعدتني
تحياتي

ماما أمولة يقول...

اختي الفاضلة وفاء

اهلا بالتاج لانه عرفنا على شخصية جميلة تستحق كل التقدير

سلام

وفاء بركات يقول...

ماما أموله
وأهلا بحضرتك وشكرا علي ذوقك.
تحياتي

فشكووول يقول...

السلام عليكم وفاء هانم
تحياتى
جيت اسلم اشوف الجديد
تحياتى

وفاء بركات يقول...

الله يسلمك يا أ.فشكوووووووووووووووووول
كلك واجب وربنا ميحرمنا من سؤالكو علينا
الف تحيه والف سلام

فشكووول يقول...

وفاء هانم
البوست بتاع الموتوسيكل مش كامل وحاولت اقراه كله لكن مش عارف المدونه واقفه ومش بتكمله ليه
على العموم انا قريته وقلت اعلق عليه هنا عشان تبقى كل البوستات فيها تعليقات ومش تزعلى منى خالص هو انا اقدر ازعلك خالص
تحياتى

وفاء بركات يقول...

أ.فشكوووووووووووووول
أيوه كده حلت البركه المهم تيجي وتثبت حضور .
فيه حاجه غريبه لما بكون في مدونات الأصدقاء وحب اكتب تعليق الماوس مش
بيستجيب والله خايفه لأخواني وأخواتي المدونين يزعلوا مني ويفتكرو إني مش بزورهم ..
المهم انك نورتنا وشكرا ليك وسلام كبير
شحط محط لأحسن حاجه في الدنيا وجميع أفراد العائله الكريمه

فشكووول يقول...

السلام عليكم وفاء هانم
انت الوحيده اللى ح استثنيها من دفع الرشاوى والاتاوات لى عشان كل ما حد يطلب منصب اقول له قدم السبت تلاقى الحد قدامك وهما كلهم قدموا السبت وبقيت غني جدا من الرشاوى واخدت كدا ييجى 45 قرش رشاوى من كل الزملاء اللى عايزين مناصب رضى والحمد لله
اما انت انا حامسكك وزيرة الشئون الناسيه والغلبانين والناس اللى ذوى الاحتياجات الخاصه يعنى بالبلدى كدا وزيره الناس الغلابه ويا سلام بقى ورزقك عند ربنا حيبقى كبير قوى
ايه رأيه بزمتك فيه حد فى الدنيا زى رئيس جمهورية فشكولستان الحره الديمقراطيه والشعبيه والاشتراكيه والبنفسجيه والحره
تحياتى يا هانم
وبعدين

Wael يقول...

:)

ربنا يدى حضرتك الصحة

نص شهر اهو بدون بوست جديد , ينفع كده يعنى (:

الخشونة فى زراير الكيبوورد باين

بس ماشى يا دكتور نوراهاتى فرحانه فيه ! ماشى ماشى , مسيرى ادبسها ف تاج ولا قفطان ان شاءالله .

على العموم انا حبيت اسجل توقيع

وفى انتظار الجديد , وياريت تعملى subscribtion عشان توصلنا ايميلات لما ينزل بوست جديد

وفاء بركات يقول...

أ. فشكوووووووووووووووول
إحنا قلنا وزارة التموين ليه بقي
الحركات الفشكولاتنيه دى وعلي العموم انا مستعده بالقيام بالوزارتين وممكن نعمل سبوبه حلوه أشحت علي الناس الغلابه وأقف بيهم عند الجوامع والمولات
وأعمل حساب في بنوك دولة حراميستان
وخلي ال45قرش ينفعوك إحنا ناس بنفكر ونتكتك ونستفيد من تجارب الأخرين
زمتي أيه بعد اللي قلته عاليه ده .
بس أيه الكتاب اللي انت قلته ده ..ده انت غلبت القائد العقيد الركن الهمام عميد الزعماء العرب
رئيس الجمهوريه العربيه الشعبيه الديمقراطيه بالطعميه .
بقول لك ايه رأيك ناخد قد 100فدان علي سطح القمر نعملهم جمهوريه فشكوليستان فكر في الموضوع ده وربنا يسهل .. يالهوى علي دى فشكله

وفاء بركات يقول...

أهلا يا دكتور وائل
ربنا يخليك ويبارك فيك .
طلباتك أوامر قلت لهبه تعمل المضاد الحيوى اللي قلت عليه ده علشان توصلك إميلات بالجديد ..
شوفلنا حاجه لخشونة زراير الكيبورد
والركب تبعنا ..
وبعدين انا لاأسمح بأى تهديد يوجه للدكتوره نورهاتي انت مش عارف إن بينا إتفاقية دفاع مشترك ,, إحنا لابيهمنا من تاج ولا قفطان بس إتشطر إنت وحل التاج وعالج نفسك من حساسية التيجان... يخونك التعليقات والزيارات وتروح تاكل ديناميت من غير متعزمني لن أنسي لك هذا الموئف ابداوعليه كل ميجيني تاج ح بعته ليك .
أيه ده انا طلعت شريره قوى إوع تزعل مني إحنا حبينا نقولولك إننا برضك عيال مخربشه وبنهدد وإن كنت من إمبابه إحنا من السيده زينب هو صحيح معندناش مطار لكن عندنا مدبح أه كلام في سرك بخاف من أدبح فرخه بس حبيت أحمر عيني
كفايه عليك كده علشان تعرف تنام
انا خوفتك جامد..
نورتنا وبوجودك البركه حلت عندنا .