الاثنين، 21 يناير، 2008

بحبها

بحبها
من يوم ماوعيت على الدنيا
وأنا بحبها وأحب اللى يحبها
فيه اللى سابها وهاجر واللى راح
لواحدة ثانية وبين الثانية والثالثة سواح
كل اللى بعد إشتاق لها وبات ليله نواح
حبيبتى كما البدر ونور فجر فى السما لاح
شعرها سنابل ذهب وخدودها تفاح
عقلى من حسنها ذهب بحبها هدوء وصياح
فى عيونها خضار ماينيمك مسا وصباح
عطشان مايرونى غير مية زينة الملاح
بحبها مهما قسيت عليه بحبها فشل ونجاح
ملقيتش غير حضنها يدفينى أنام وأ رتاح
ورمشها يغطينى أصحى على ضيها الوضاح
ما انا بحبها وبحب اللى يحبها
للآن بحبها حتى بعد مانيلها لوثوه
وزرع خيرها سرطنوه
وهواها بدخان أسود خنقوه
ومالها من البنوك سرقوه
برضه بحبها طب هيه آيه ذنبها ؟
ماهى عطتنى كتير دلوقت أتنكر لها !
ياما إتحميت من الحر بضلها
وفى عز البرد دفتنى شمسها
بحبها والله لسه بحبها وحفضل أحبها
بحب نيلها وتراب ارضها
قلبى يرفف لما يذكرإسمها
ودموع عنيه تسيل لو إتهزت شعره منها
مصر بلدى حته منى وانا حته منها
فى حد بيحب مصر زى ما بحبها ؟

هناك 7 تعليقات:

ahmed يقول...
أزال المؤلف هذا التعليق.
Ahmed Al-Sabbagh يقول...

رائعة كالعادة

وكل اعمالك جميلة

وأظن ان الكثيرين يحبون مصر

ولكن هل مصر تحبنا ؟

تقبلى تحياتى

أحمد

أحمد منتصر يقول...

جميلة جدا

زجل من أفضل ما سمعته في حب مصر

NoNa يقول...

اولا : تسلم ايدك على كلمات جميلة

وكفاية انها طالعة صادقة وجميلة

ثانيا : هارد على استاذ احمد صباغ انت بتقول هل مصر بتحبنا ؟

هى اكيد بتحب اولادها محدش بيكره ولاده بس هى ملهاش ذنب انك تقول هى بتحبنا ولا


تسلم ايدك يااستاذة وفاء بجد رائعة

وفاء بركات يقول...

السلام عليكم
اهلا خالو احمد
كلنا بنحب مصر زى مابنحب اهلنا
محدش اختار اهله ومحدش اختار بلده
زى برده منقدرش نتنكر لأهلنا منقدرش نتنكر لبلدنا...
احنا قدرها وهي قدرنا ومهما رحنا بعيد عنها هي وطنا اللي أختارناه
مرور غالي شرفتنا

وفاء بركات يقول...

السلام عليكم
أحمد منتصر ...
الله يكرمك حاجه كده علي قدنا
شكرا علي المرور ...

وفاء بركات يقول...

لسلام عليكم
نونا

يادى النور يادى النور شكرا ياغاليه علي المرور
معلش الظاهر مصر مزعله خالو احمد
وخالو قلبه ابيض وبيتصالح بسرعه
تسلمي لي يانونا.. تحياتي